Компанијата xAI, предводена од милијардерoт Илон Маск, е подготвена за нов технолошки напредок. Денеска ќе го претстави Грок 3 (Grok 3), својот најнапреден чет-бот со вештачка интелигенција.
Маск тврди дека Грок 3 е „најпаметната вештачка интелигенција во светот“ и ги истакнува нејзините исклучителни способности за расудување. Моделот, наведува тој, е обучен на синтетички податоци и е способен за саморефлексија – може да ги препознае сопствените грешки и да се прилагоди за да одржува логичка конзистентност.
Лансирањето на Грок 3 доаѓа во време на зголемена глобална конкуренција во секторот за вештачка интелигенција. Кинескиот стартап DeepSeek неодамна претстави поевтин модел кој може да се совпадне со ChatGPT на OpenAI во перформансите, што дополнително ја интензивира конкуренцијата на пазарот.
Покрај технолошките иновации, xAI е во преговори и за нова инвестиција вредна 10 милијарди долари, што би можело да ја зголеми вредноста на компанијата на дури 75 милијарди долари. Во план е проширување на капацитетот на центрите за податоци и развој на нови модели за вештачка интелигенција.
Според Ројтерс, фирмата на Маск неодамна собрала 6 милијарди долари, со што нејзината проценка достигна 40 милијарди долари.
Вклучувањето на Маск во индустријата за вештачка интелигенција има долга и турбулентна историја – во 2015 година, тој го основаше OpenAI со Сем Алтман, но ја напушти компанијата во 2018 година поради несогласувања околу развојната стратегија. Тој неодамна понуди 97,4 милијарди долари за преземање на непрофитниот дел на OpenAI, обидувајќи се да ја спречи неговата комерцијализација, но Одборот на директори едногласно ја отфрли понудата. Ривалството меѓу Маск и Алтман не стивнува и нема знаци дека наскоро ќе заврши.
Grok 3 претставува клучен дел од стратегијата на xAI да стане сериозен конкурент на воспоставените решенија како ChatGPT, бидејќи Маск продолжува да ги поместува границите во секторот за вештачка интелигенција.
