Зеленски и Маѓар се договорија за нормализација на односите

Унгарскиот премиер Петер Маѓар се сретна за првпат со украинскиот претседател Володимир Зеленски на маргините на состанокот на Европскиот совет, во обид да ги подобри односите меѓу двете земји, кои со години се оптоварени со спорови околу правата на унгарското малцинство во Украина и пристапувањето на Украина во Европската Унија.

Средбата следеше по неколкумесечни преговори за нејзино одржување, а двете страни ја гледаат како можност за нормализирање на односите.

Поранешниот унгарски премиер Виктор Орбан, ја сметаше Украина за безбедносна закана за Унгарија и отворено се спротивстави на нејзиното членство во ЕУ.

- Advertisement -

По изборната победа на Тиса, Маѓар најави попрагматичен пристап кон Киев, но инсистираше Украина да ги исполни своите обврски во врска со правата на унгарското национално малцинство.

– Како прв чекор кон враќање на меѓусебната доверба, оценивме дека украинскиот парламент го усвои законот за образование на малцинствата во согласност со договорот и дека украинската страна веднаш почна да го спроведува – рече Маѓар по состанокот.

Тој најави продолжување на разговорите на министерско ниво и изрази солидарност со Украина поради руската агресија.

– Го уверив украинскиот претседател во мојата целосна солидарност во врска со нехуманата руска агресија врз неговата земја, која трае речиси 5 години – рече унгарскиот премиер.

Зеленски средбата ја оцени како „многу добра“.

– Многу работи дискутиравме. И за односите, и за економијата, и за логистиката. Сето тоа им е потребно на нашите држави – изјави Зеленски по разговорот.

Тој посочи дека двете страни се согласиле да ја обноват соработката на различни нивоа и да разменат посети и нагласи дека Украина е заинтересирана за добрососедски односи и заемно зајакнување на двете држави.

Се очекува двајцата лидери наскоро повторно да се сретнат. Маѓар најави можност за средба во текот на есента во Берегов, град на западот од Украина кој претставува еден од центрите на унгарската заедница, која брои околу 100.000 луѓе.

Зеленски е поканет и во Будимпешта на настаните по повод 70-годишнината од Унгарската револуција, закажани за 23 октомври, што би можело да биде следниот чекор во дипломатското приближување.