Европа се вади на Босна за да ја пролонгира исплатата за Западен Балкан

Првите редовни исплати на средства во рамки на Планот за раст на Западниот Балкан се очекуваат помеѓу вториот и третиот квартал од 2025 година, откако ќе бидат исполнети предвидените услови за тоа, изјави за МИА портпарол на Европската комисија.

Тој посочи дека за спроведување на реформите утврдени со Реформските агенди подготвени како дел од Планот на ЕК за раст на Западниот Балкан, шесте земји од регионот може да побараат средства во форма на предфинансирање во износ до седум отсто од вкупната сума предвидена со овој инструмент за секоја од нив.

– Тоа го побараа сите пет корисници со одобрени Реформски агенди, освен Босна и Херцеговина која сѐ уште не ја достави својата Реформска агенда. Комисијата сега ги финализира процедуралните чекори, кои треба да овозможат исплата на предфинансирањето што е можно поскоро во 2025 година. Првите редовни плаќања се очекуваат помеѓу вториот и третиот квартал во 2025 година по исполнување на предвидените услови – додаде портпаролот во изјавата.

- Advertisement -

Медиуми од регионот викендов објавија дека првите исплати од Планот за раст за Западниот Балкан нема да бидат извршени во првата половина од оваа година, како што беше претходно најавено.

Според овие наводи, застојот е предизвикан поради тоа што земјите од регионот треба да склучат договори за позајмици со Европската Унија, бидејќи дел од средствата што ќе им се доделат во рамки на Планот се во форма на заеми, а дел грантови, па секој од тие договори имаат карактер на меѓународна спогодба што мора да биде ратификувана од Парламентот на соодветната држава.

Нашето Собрание на 27 декември минатата година по скратена постапка го усвои Законот за задолжување со заем кај Европската Унија по Договор за заем од Инструментот за реформи и раст за Западен Балкан, со кој се овозможува исплата на над 750.000 евра како предфинансирање за земјава од Планот за раст.

– Македонија со целосно спроведување на реформите од Реформската агенда ќе добие 750.354.553 евра во периодот 2024-2027 година, од кои 535.012.159 евра заем и 215.342.394 евра грант. Од нив 349.095.433 евра заем се наменети за буџетска поддршка, а 185.916.725 евра заем и 215.342.394 евра грант се наменети за инвестициски проекти. Најмалку 37 отсто од грантот ќе бидат наменети за климатски цели. Сите повлечени средства од заемот ќе се отплаќаат најдоцна 40 години од датумот на потпишување на Договорот за заем со вклучен грејс период до 10 години – посочи Министерството за финансии при предлагањето на Законот.