Колумбискиот претседател Густаво Петро изјави дека кокаинот не е полош од вискито и дека е нелегален само затоа што се произведува во Латинска Америка. Ова контроверзно тврдење го изнел за време на шестчасовната владина седница, предизвикувајќи бурни реакции внатре и надвор од државата.
„Кокаинот е нелегален затоа што се произведува во Латинска Америка, а не затоа што е полош од вискито“, рече Петро, тврдејќи дека американската политика со години ја демонизира дрогата додека толерира други супстанции.
Колумбија, најголемиот светски производител и извозник на кокаин, со децении се бори против трговијата со дрога, но Петро верува дека војната против дрогата е политички мотивирана и водена од интересите на моќните држави.
„Научниците го анализираа ова прашање: кокаинот не е полош од вискито“, додаде Петро, сугерирајќи дека глобалната кокаинска индустрија би можела „лесно да се разбие“ доколку дрогата биде легализирана ширум светот.
„Ако некој навистина сака мир, трговијата со дрога мора да биде уништена. Ова лесно може да се постигне со легализација на кокаинот на глобално ниво. „Тоа би се продавало како вино“, истакна тој.
Критика на американската политика и конфликт со Трамп
Петро во својот говор направи паралела меѓу кокаинот и фентанилот, дрогата која е главната причина за опиоидната криза во САД.
„Фентанилот ги убива Американците, но не се произведува во Колумбија“, изјави Петро, нагласувајќи дека оваа супстанца е развиена во американските фармацевтски компании и дека неговите корисници станале зависници токму поради легалната дистрибуција.
Изјавата на Педро доаѓа во време кога односите меѓу Колумбија и САД се заладија по одлуката на Богота да им забрани на американските воени авиони да слетуваат со депортирани мигранти. Администрацијата на Доналд Трамп реагираше остро, заканувајќи се дека ќе воведе царини за колумбискиот извоз, што ја принуди владата на Педро да попушти и да ги прифати мигрантите „без ограничувања и одложувања“, соопшти Белата куќа.
Рекорден раст на производството на кокаин
Според податоците на Обединетите нации, производството на кокаин во Колумбија достигна рекордно ниво во 2023 година, скокајќи за 53 отсто на повеќе од 2.600 тони. Овие податоци покажуваат дека и покрај децениската борба со дрогата, Колумбија останува епицентар на глобалната трговија со кокаин, пишува Politico.
