Државниот јавен обвинител Љупчо Коцевски обелодени дека се водат уште 6 предистражни постапки за работењето на ЕСМ и се проверува целата документацијата за тендерите за јаглен и за мазут во државните електрани.
По отворањето на истрагата за случајот „Адитив“ во која се опфатени 23 лица, меѓу кои и поранешниот директор на ЕСМ Васко Ковачевски, кој е во бегство и по кој е распишана меѓународна потерница, наскоро јавноста може да очекува и нови истраги.
– Еве, првпат ќе ви соопштам дека во моментов Основното јавно обвинителство Битола работи на шест постапки за тендери. Плус работи и на други, за други постапки за набавка на јаглен, мазут итн., што значи дека има доста работа. Се прибираат докази. Во еден дел се активирани и МВР и БЈБ со нивното Одделение за сузбивање на криминалот, така што во скоро време очекувам и таму да имаме резултати – изјави државниот јавен обвинител Коцевски во интервју за емисијата „360 степени“.
Тој најави и дека од 1 февруари се очекува отворање на истражен центар во Битола, кој ќе биде од голема помош за детаљно да се истражат случаите.
– Од ова што го имам како информација, ОЈО Битола интензивно работи, со полн капацитет, на овие предмети, со тоа што, од 1 февруари ќе формирам и таму истражен центар. Истражен центар останува да се формира и во ОЈО Штип, така што се надеваме дека ќе биде од голема помош – рече Коцевски.
Кон крајот на ноември минатата година беше отворена предистрага за предметот доставен до Основното јавно обвинителство за гонење на организиран криминал и корупција. Две недели подоцна, големата полициска акција заврши со поднесување на 23 кривични пријави за лица кои се осомничени дека учествувале во набавка на адитиви за потребите на РЕК „Битола“ и на ТЕЦ „Осломеј“, кои, не само што биле платени неколкукратно поскапо од пазарната цена, туку потоа речиси не се употребувале затоа што биле несоодветни. Има сомненија и дека адитивот предизвикал штета на машините, таму каде што бил употребен.
