20.000 НОВИНАРИ ОД СТОТИНА ЗЕМЈИ АКРЕДИТИРАНИ ЗА ПРЕСОТ НА ПУТИН

Рускиот претседател Владимир Путин денеска ќе одговара на прашања од странски новинари, на вториот ден од Меѓународниот економски форум што се одржува во Санкт Петербург.

– Претседателот Путин ќе се сретне со претставници на меѓународни медиумски организации за да разговара за внатрешната и надворешната политика на Русија – соопшти неговиот советник за надворешна политика, Јури Ушаков.

Претходните години таквите сесии со новинари вообичаено траеја и по неколку часа.

- Advertisement -

Москва го користи Форумот за да ја претстави Русија на меѓународната сцена и да покаже отпорност по повеќе од четири години војна во Украина и санкции, и покрај забавениот економски раст.

Форумот вчера започна во отежнати услови, откако напад со украински дрон предизвика тревога што траеше неколку часа. За време на пристигнувањето на учесниците над делови од градот имаше црн чад, од пожарот што го зафати нафтениот терминал.

Според информации од Кремљ, на Форумот се регистрирани околу 20 илјади учесници од повеќе од сто земји. Меѓу учесниците има делегации од Американската стопанска комора и од германски компании.

Германско-руската стопанска комора за првпат по неколку години организира сопствен настан на форумот.

На форумот присуствуваат и неколку пратеници од крајно десничарската партија „Алтернатива за Германија“. Тие заминаа за Русија и покрај препораките на германското Министерство за надворешни работи да се воздржат од такво патување.