ЗНАМ не се распаѓа, но партијата на Максим Димитриевски се кине на сите шавови

Политичкото движење, односно партија ЗНАМ, според Максим Димитриевски, не се распаѓа, но реалната состојба внатре во партијата е далеку покритична, бидејќи структурата буквално се кине на сите шавови.

Од најновата реконструкција на Владата, која ќе се случи под раководство на Христијан Мицкоски, нема место за досегашниот министер за правда, Игор Филков. Веднаш потоа следеше извесна доза на симулирано незадоволство во провладините медиуми, при што се пласираше теза дека ЗНАМ наводно не се согласува со ваквата одлука. Од друга страна, министерот Минчев, се бори за поинаква цел, со секоја цена да се задржи министерската фотелја, без оглед на тоа кој ја заслужил или кој ја предвидел реконструкцијата.

За период од две години, ЗНАМ изгуби половина од своето членство. Единствено Куманово, каде делува Максим Димитриевски (благодарение на ромите), останува нивна релативно стабилна основа. Состојбата во Битола, каде нивна претставничка е Весна Бендевска, се оценува како трагична, со партијата практично во исчезнување. Во Скопје, присуството на ЗНАМ веќе речиси не постои.

- Advertisement -

Единственото место каде партијата сè уште задржува извесен степен на влијание е Охрид, благодарение на Јован Мирчевски, познат како Пупе, и неговата екипа, каде, според расположливите податоци, бројат околу деветстотини членови и симпатизери.

Иднината на ЗНАМ, изгледа, е во силна надолна линија. Доколку на наредните парламентарни избори настапат самостојно, нивниот изборен резултат реално ризикува да се толкува како статистичка грешка. Сепак, информациите со кои располага редакцијата на Охридскај, посочуваат дека доколку се случат предвремени избори, ЗНАМ најверојатно ќе биде дел од поширока коалиција, како придружна партија на ВМРО ДПМНЕ. Во таков сценарио, единствената реална надеж за партијата би била евентуално министерство за статистички грешки, доколку такво воопшто некогаш се отвори.

С.Денесовски