Вработен во УЈП ги предупредувал казината пред да имаат контроли

Тетовската полиција го разоткрила планот на 50-годишен службеник од УЈП кој тајно доставувал информации за инспекциските контроли во казино во градот.

Вообичаено, инспекторите на Управата за јавни приходи (УЈП) имаат пристап до доверливи информации за претстојните инспекции, но овојпат еден од нив решил да ја искористи својата позиција за да ги предупредува сопствениците на казино во Тетово.

Според полициската истрага, на 21 јануари 2025 година, осомничениот Г.О. (50) од Тетово ја злоупотребил својата службена положба и на менаџерот на казиното му соопштил кога ќе има контрола, овозможувајќи му да ги сокрие неправилностите пред да пристигнат инспекторите.

- Advertisement -

Овој потег предизвикал сериозни сомнежи кај надлежните, кои по неколку неуспешни акции на терен решиле да започнат тајна истрага. Под лупа се нашле комуникациите и движењата на вработени во УЈП, а токму така истражителите дошле до информација дека токму Г.О. бил врската меѓу казиното и службите.

„Со координирана акција на полицијата, било утврдено дека осомничениот го предупредил казиното непосредно пред инспекторите да тргнат на терен. Полицијата го документирала неговото оддавање на доверливи информации, по што против него е поднесена кривична пријава за злоупотреба на службената положба и овластување“, велат од полицијата.