Во реонот на Гази Баба околу полноќ се случил тежок инцидент на семејно насилство, во кој 36-годишен маж повредил повеќе членови на своето семејство и им упатувал закани за живот

Во реонот на Гази Баба околу полноќ се случил тежок инцидент на семејно насилство, во кој 36-годишен маж повредил повеќе членови на своето семејство и им упатувал закани за живот, соопшти Основното јавно обвинителство Скопје.

Според обвинителството, мажот најпрво започнал расправија во семејниот дом, по што ситуацијата брзо ескалирала. Тој ја нападнал сопругата, ја фатил за рака и ја турнал, при што таа се здобила со телесни повреди.

Потоа насилството продолжило, тој започнал да ја крши покуќнината, а потоа со маса замавнал кон тештата, нанесувајќи ѝ повреди на ногата и градниот кош.

- Advertisement -

„Во текот на инцидентот осомничениот упатувал сериозни закани по животот на присутните, при што во еден момент извадил нож и замавнувал со него, предизвикувајќи силно чувство на страв и загрозеност кај оштетените“, информираат од Основното јавно обвинителство Скопје.

Според истрагата, во моментот на инцидентот во домот се наоѓале и две малолетни деца на возраст од 6 и 4 години, на кои исто така им биле упатени закани.

Сопругата успеала да ги повика на помош својот татко и брат, но и тие биле нападнати при пристигнувањето. Во целиот хаос, куче од расата шарпланинец кое било во дворот го каснало братот, при што му нанело повреди од угриз.

Од Обвинителството додаваат дека случајот се третира како сериозен безбедносен ризик.

„Постои основано сомнение за повеќе кривични дела, а има и ризик од бегство и повторување на насилството. Поради тоа е предложена мерка притвор“, наведуваат од ОЈО Скопје.