ВО ОХРИД СЕ ОДРЖА РЕГИОНАЛНИОТ НАСТАН „ФЕР ТУРИЗАМ ЗАПОЧНУВА СО ПРИЈАВЕН ДОХОД“

Во Охрид денеска се одржа регионалниот настан „Фер туризам започнува со пријавен доход“, организиран од Управата за јавни приходи, чија цел е подигнување на информираноста кај даночните обврзници за нивните обврски поврзани со пријавувањето и оданочувањето на доходот остварен од издавање недвижен имот.

На настанот присуствуваа претставници на надлежните институции, организатори и туристички работници, а во рамки на настанот свое обраќање имаше Ана Крстеска, заменик градоначалник на Општина Охрид.

– Чест и задоволство ни е што денеска нашиот град е домаќин на регионалниот настан „Фер туризам започнува со пријавен доход“.

За Охрид, како еден од најзначајните туристички центри во Македонија, уредниот, одржлив и фер туризам е од особено значење. Туризмот е важен двигател на локалната економија, но неговиот развој мора да се темели на јасни правила и еднакви услови за сите.

Овој настан има за цел да ги информира даночните обврзници за нивната обврска навремено и точно да го пријават остварениот доход и да им обезбеди основни информации за правилно исполнување на даночните обврски.

Овие правила се однесуваат на сите граѓани-закуподавачи кои остваруваат доход од издавање на недвижен имот, односно станови, вили, викендички, апартмани или соби, вклучително и издавање преку домашни или странски дигитални платформи.

Нашата локална самоуправа, во рамки на своите надлежности, има воспоставено систем за категоризација на објектите за сместување, а значајна улога има и туристичката такса како дел од системот за уредување и следење на туристичката активност.

Но, за фер туризам не е доволно само да постојат правила. Потребни се континуирана контрола, навремена размена на информации и, пред сè, заедничка и координирана соработка меѓу институциите.

Особено е важно да се спречи нелојалната конкуренција и да се обезбедат еднакви услови за сите што работат во туристичкиот сектор. Оние кои ги исполнуваат своите законски обврски, инвестираат во квалитет и придонесуваат за локалната економија треба да имаат соодветна позиција на пазарот.

Затоа, соработката меѓу Општина Охрид, Управата за јавни приходи и останатите надлежни институции е од суштинско значење.

Само преку заеднички пристап можеме да постигнеме подобра контрола, поголема информираност и поуреден и поконкурентен туристички сектор.

Нашата цел е Охрид да продолжи да се развива како атрактивна туристичка дестинација, но и како пример за одговорен, квалитетен и фер туризам, истакна Крстеска во своето обраќање.

На настанот свое обраќање имаа претставниците на УЈП, Весна Николоска Ристовска, Сузана Стошеска Николовска, Катерина Митевска и Андриана Липитова кои го истакнаа значењето на навременото и точно пријавување на доходот, особено во услови на зголемена употреба на домашни и странски дигитални платформи за изнајмување на сместувачки капацитети.