ВНИМАНИЕ, АЛБАНИЈА ДРАСТИЧНО ГИ ЗАОСТРУВА КАЗНИТЕ ВО СООБРАЌАЈОТ

Албанија драстично ги заостри сообраќајните правила за опасните и за повторените прекршоци.

Најтешката мерка предвидува трајно одземање на возачката дозвола. Се работи за повторниците фатени со повеќе од 0,5 промили алкохол во крвта.

Построги последици следуваат и за возење без дозвола. Возачите ќе бидат казнувани, а ќе им се одложува и правото да добијат дозвола.

- Advertisement -

Кај малолетниците правилото е уште построго. Правото за добивање дозвола се одложува 2 години откако ќе ја достигнат законската возраст.

Младите добија црвена линија

Ограничувања има и за новите возачи. Тие не смеат да возат побрзо од 90 километри на час на автопат.

Прекршувањето носи казна од 5.000 до 15.000 леки. Предвидени се и одземање бодови и едномесечна суспензија на дозволата.

Новите правила предвидуваат ограничувања и за ноќното возење. Посебниот режим ги опфаќа младите и неискусните возачи.

Одземената дозвола повеќе не може да се „откупи“ со двојна парична казна.

Мобилниот сега чини 3 месеци

Заострени се санкциите и за брзо возење во населени места. Посебно се третираат прекршоците во близина на училишта. Опасните маневри и недозволените натпревари носат казни од 20.000 до 60.000 леки.

Нов удар следува и за возачите кои не го испуштаат мобилниот телефон. За два такви прекршоци во една година возачката дозвола се одзема на 3 месеци.

Забраната се проширува и надвор од автомобилите. Таа важи за велосипедисти, возачи на мотоцикли до 50 кубни сантиметри и на електрични тротинети.

Целта е да се спречат смртоносни несреќи

Генералниот директор на албанската Државна полиција, Скендер Хита, рекол дека казнувањето не е единствената цел.

– Не е во наш фокус само да идентификуваме прекршоци, туку да ја подигнеме свеста кај граѓаните, да ги спречиме овие прекршоци во сообраќајот и да избегнеме смртоносни несреќи. Апелираме до сите возачи да не користат мобилни телефони, да не возат под дејство на алкохол и наркотици, да не ги надминуваат ограничувањата на брзината, бидејќи брзината убива. Почитуваното правило е уште еден спасен живот – изјавил Хита.

Албанската полиција ќе ги засилува контролите на главните и на меѓуградските патишта. За надзор ќе користи и полициски дронови.