Денеска во Србија почна генерален штрајк кој студентите во блокадата го најавија претходните денови.
„Ние не одиме на работа, не одиме на предавања, не ги извршуваме секојдневните обврски. Ја земаме слободата во свои раце. Вашето учество прави разлика“, напишаа студентите на Инстаграм во средата.
Адвокатите во Србија денеска ќе започнат тридневен прекин на работа, кој ќе трае до 26 јануари, поради прекршување на владеењето на правото и закана за автономијата и независноста на Адвокатската комора на Србија.
Комората најави дека адвокатите за време на прекинот на работата нема да влегуваат или престојуваат во просториите на судовите, обвинителствата, полицијата, органите на управата, јавните извршители и нотарите по ниту една професионална основа.
На штрајкот, покрај факултетите низ државата и дел од основните и средните училишта, се огласија и многу фирми, културни установи, угостителски објекти, мали бизниси, организации, но и синдикатите во државните претпријатија и градските администрации.
Демократската партија денеска соопшти дека го поддржува генералниот штрајк бидејќи овој метод на борба е „патоказ до правдата“.
За денеска во 14 часот е закажан протест „Да разговараме кој е толпа, а кој ѓубре“ во организација на Одборот за протест на адвокатите пред зградата на Српското претседателство. Протесни маршеви и блокади се организираат и во многу градови низ Србија.
Најавено е дека во 11:52 часот на повеќе локации во Србија ќе продолжи оддавањето почит кон загинатите во несреќата на железничката станица во Нови Сад, по што ќе се одржи генерален штрајк.
Просветниот пленум на градот Ниш донесе одлука за целосен прекин на наставата во основните и средните училишта на територијата на тој град до исполнување на барањата на учениците. Во соопштението беше наведено дека одлуката е донесена едногласно, со јавно гласање.
Просветните работници испратија писмо до родителите од пленумот и ги повикаа да ги поддржат во борбата што ја водат учениците.
„Да бидеме заедница која ќе ги смени овие луди рамки што ни се наметнати – не праќајте деца во училишта, застанете покрај нас! Само така, заедно ќе дочекаме и ќе се бориме за подобро утре“, се наведува во писмото испратено од воспитувачите до родителите.
Првата нишка гимназија „Стеван Сремац“ и основното училиште „Душан Радовиќ“ се во целосен прекин, а во две училишта наставниците одржуваат настава во рамките на законскиот штрајк од 30 минути.
На штрајкот се приклучи и раперот Стефан Ѓуриќ Раста.
Граѓаните на Србија кои утрово сепак мораа да одат на работа останаа изненадени бидејќи во градот нема гужви.
Бројни компании, здруженија и политички партии најавија дека ја поддржуваат оваа акција, пренесува Н1 кој известува дека се приклучува кон генералниот штрајк и за тоа ќе известува само денеска.
Во соопштението на таа партија се наведува дека граѓаните имаат легитимно право да се побунат против лошата власт.
„Генералниот штрајк е начин да се спроведе овој бунт мирно. Никој што ја води оваа легитимна борба не може да сноси никакви последици за неа. Студентите ќе имаат предавања, вежби и испитни рокови кои ги пропуштиле поради мудрата и херојска борба што ја водат. Ниту еден родител, наставник или ученик кој учествува во блокадите не може да биде санкциониран на кој било начин поради борбата за нормална Србија“, додаваат од партијата.
