УБИЕН Е ПОЗНАТИОТ БУГАРСКИ БИЗНИСМЕН СЛАВИ БИНЕВ ВО СОФИЈА

Познатиот бугарски бизнисмен Слави Бинев е застрелан во софиската населба „Павлово“, соопшти Софиското градско обвинителство за бугарската телевизија bTV.

Според првичните информации, до инцидентот дошло утрото на 24 октомври. Сигналот за пукањето бил пријавен на итниот телефон 112 во 10:18 часот. Полициски екипи и екипи на итната медицинска помош пристигнале на местото, каде што била констатирана смртта на бизнисменот.

Според информациите од главниот секретар на бугарското Министерство за внатрешни работи, Љубомир Николов, Бинев бил погоден со еден куршум во главата. На местото на злосторството била пронајдена една чаура.

- Advertisement -

Бугарската полиција привела тројца мажи осомничени за поврзаност со убиството. Тие биле запрени на 54-тиот километар од автопатот „Тракија“, откако полицијата забележала дека возилото со кое се движеле ја напушта Софија.

Според првичните информации од бугарските власти, двајца од приведените се со турско потекло, додека третиот поседувал бугарски документи за идентификација.

При приведувањето биле пронајдени два пиштола. Едниот, според сомнежите на истражителите, бил фрлен од возилото непосредно пред неговото запирање, додека другиот бил пронајден во торбичка кај еден од приведените. Засега не е утврдено кој од тројцата пукал во Бинев.

Главниот секретар на бугарското МВР, Љубомир Николов, изјавил дека водечката верзија на истрагата е убиство поради нерегулирани финансиски односи.

Според информациите на истражителите, тројцата приведени се занимавале со градежништво и во моментот градат два станбени комплекси во Софија. Сепак, засега не е утврдена деловна поврзаност меѓу нивната компанија и Бинев.

Николов оценил дека случајот засега не упатува на нарачано убиство, посочувајќи дека осомничените и бизнисменот се познавале подолго време.

Според истражителите, постои сведок кој забележал дека тројцата мажи пристигнале кај Бинев, а потоа го напуштиле имотот. Сепак, во моментот на првичните соопштенија немало сведок што непосредно го слушнал разговорот меѓу нив.

Телевизијата БТВ објавила дека располага со снимки од безбедносни камери на кои се гледаат пристигнувањето на возилото и средбата на Бинев со тројцата мажи.

Околу 18:30 часот, тројцата приведени биле однесени во Софиската дирекција на внатрешни работи на распит. Според првичните информации, во тој момент сè уште не им биле поднесени обвиненија.

Истрагата треба да ги утврди точните околности на убиството, улогата на секој од осомничените и можниот мотив за нападот.