Прекините во воздушниот сообраќај во САД продолжија и трет ден по ред, при што во неделата беа погодени повеќе од 10.000 летови. Сепак, американскиот министер за транспорт Шон Дафи очекува состојбата постепено да се нормализира, додека авиокомпаниите се обидуваат да воспостават редовен распоред по целосната забрана за полетувања што беше воведена на ниво на целата земја.
Според податоците на специјализираната интернет-страница „FlightAware“, во неделата низ САД биле откажани повеќе од 2.300 летови, а околу 7.700 доцнеле. Во саботата американските авиокомпании откажале повеќе од 6.400 летови, додека над 8.000 летови доцнеле.
Дафи во емисијата „This Week“ на телевизијата Еј-Би-Си изјави дека нема докази за кибернапад или друга злонамерна активност, но причината за инцидентот сè уште не е позната. Тој очекува воздушниот сообраќај во неделата „да се врати во нормала“, а во понеделник „веројатно целосно да се нормализира“. Притоа нагласи дека приоритет на Федералната управа за воздухопловство (FAA) е безбедноста на патниците.
Во неделата биле откажани 28 отсто од летовите на „JetBlue“ и 17 отсто од летовите на „American Airlines“. „United Airlines“, „Southwest“ и „Delta“ пријавиле откажување на меѓу три и пет отсто од своите летови.
„FAA“ во петокот издаде наредба за целосна забрана за полетувања на територијата на целата земја, поради што речиси сите летови беа приземјени речиси пет часа. Тоа беше најдолгиот прекин на воздушниот сообраќај во САД од терористичките напади на „Ал Каеда“ врз Соединетите Американски Држави на 11 септември 2001 година.
Според официјалните лица, поставувањето најмалку еден нов рутер на оддалечена локација – работа што ја извршил „L3Harris“, договорен партнер на „FAA“ – предизвикало преоптоварување на други центри за контрола на воздушниот сообраќај со огромен прилив на податоци. Тоа ги нарушило комуникациските системи.
Дафи во неделата изјави дека замената на рутер во објект на „FAA“ во Ел Дорадо, Арканзас, предизвикала проблеми со рутерот што неодамна бил заменет во Амарило, Тексас. Уредот почнал да испраќа податоци што ги преоптовариле рутерите во другите центри за контрола на воздушниот сообраќај низ земјата.
„FAA“ во неделата соопшти дека ја оневозможила „функционалноста на изворните рутери“, додавајќи дека истото го направила и со уште околу 60 слични уреди во системот за контрола на воздушниот сообраќај.
– Сепак, сè уште не е познато што точно го предизвикало проблемот за време на редовното одржување – постапка што досега била извршена илјадници пати без никакви тешкотии – рече Дафи.
– Веруваме дека работникот што го поставил рутерот е добар американски патриот и ветеран, па затоа не сметаме дека некој се обидел да ја саботира мрежата за време на инсталацијата. Но, вистинската причина за проблемот сè уште не сме ја утврдиле – изјави Дафи.
Прекинот во петокот е најновиот и најсериозен показател за преоптовареноста на американскиот систем за контрола на воздушниот сообраќај. Тој се соочува со застарена технологија, проблеми со опремата и комуникациите, како и недостиг од неколку илјади контролори на летање.
– Рутерите кај кои се појавиле проблемите биле набавени во 2001 година, а веќе во 2006 година биле застарени – наведе Дафи.
По инцидентот во петокот, тој побара 50 милијарди долари за модернизација на системот за контрола на воздушниот сообраќај. Тоа е зголемување во однос на неговото претходно барање од 30 милијарди долари, откако Конгресот минатата година одобри 12,5 милијарди долари.
Американскиот претседател Доналд Трамп во неделата првпат јавно ги коментираше проблемите во воздушниот сообраќај што се појавија во текот на викендот, повикувајќи ги и американските законодавци да обезбедат дополнителни средства.
– Веќе почнавме со работите, но тоа треба да се направи одеднаш, а не на лажичка. Конгресот мора да го одобри тоа – напиша Трамп на социјалните мрежи.
Демократите во јануари ќе ја преземат контролата врз Конгресот од републиканците, партиските колеги на Доналд Трамп, откако освоија повеќе места на американските меѓуизбори одржани на 3 ноември.
Барањето на Дафи за дополнителни средства наиде на скептицизам кај конгресмените Рик Ларсен и Андре Карсон, водечките демократи во Комитетот за транспорт и инфраструктура на Претставничкиот дом, односно во неговиот Поткомитет за воздухопловство.
Од 12,5 милијарди долари одобрени во 2025 година за модернизација на системот за контрола на воздушниот сообраќај, околу 11 милијарди долари сè уште не се потрошени, наведоа Ларсен и Карсон во соопштението објавено во саботата.
– Објаснете му на Конгресот уште еднаш зошто се потребни повеќе пари – порачаа двајцата конгресмени.
Дафи во неделата изјави дека средствата одобрени минатата година биле наменети исклучиво за конкретни ставки и дека во нив не биле предвидени пари за нов софтвер за управување со воздушниот простор.
И експертите што го следат воздушниот сообраќај повикаа на зголемување на инвестициите од приватниот сектор.
ОhridSky е ваш доверлив извор за сеопфатно и избалансирано покривање на вестите. Со посветеност на интегритет и точност, обезбедуваме длабинско известување кое ги открива приказните што се најважни.
© 2025 OhridSky. Сите права задржани.
Please login or subscribe to continue.
No account? Register | Lost password
✖✖
Are you sure you want to cancel your subscription? You will lose your Premium access and stored playlists.
✖
