Трамп за уште еден месец ги одложи санкциите за продажба на руска нафта

Владата на САД ја продолжи лиценцата за купување санкционирана руска нафта натоварена на танкери за уште еден месец, соопшти американското Министерство за финансии.

„Канцеларијата за контрола на странски средства (OFAC) на Министерството за финансии на САД издаде нова дозвола во петокот, според која руската нафта и нафтени производи натоварени на танкери до 17 април можат да се купат до 16 мај“, се вели во документот.

Трансакциите со Иран, Куба и Северна Кореја се ослободени од дозволата.

- Advertisement -

По трет пат од почетокот на американско-израелската војна против Иран, Вашингтон ги суспендираше санкциите за руската нафта и нафтени производи, обидувајќи се да го ограничи порастот на цените на светските пазари.

OFAC ја издаде првата 30-дневна лиценца за купување руски барели на Индија на 5 март. Една недела подоцна, лиценца беше издадена и за остатокот од светот, исто така за 30 дена, а купувањето заврши на 11 април.

Новата дозвола беше издадена под притисок од азиските земји, кои, поради прекините во снабдувањето од Блискиот Исток, побараа од Вашингтон да овозможи набавка од други извори.

– Преговорите (со Иран) се забрзуваат, а Министерството за финансии се грижи нафтата да им биде достапна на оние на кои им е потребна – изјави портпарол на министерството.

Продолжувањето на американската лиценца ќе вклучи уште 100 милиони барели руска нафта, според специјалниот претставник на рускиот претседател Владимир Путин, Кирил Дмитриев, и ќе го удвои количеството барели со американската лиценца.

Меѓународната агенција за енергија (ИЕА) во својот месечен извештај наведе дека во март 4,4 милиони барели руска нафта дневно беа испорачани до купувачи низ целиот свет, или вкупно им беа испорачани 132 милиони барели руска нафта.

„Приближно 22 милиони барели руска нафта беа истоварени од танкери на индиското копно во март, а 14 милиони барели беа истоварени на кинеското копно, „чистејќи“ ја руската нафта акумулирана на море од октомври минатата година“, наведе агенцијата.