ГАЗДА ДЕКО ГО ОДНЕСОА ОД СУДНИЦА СО БРЗА ПОМОШ

На судењето во Идризово за пожарот со дискотеката „Пулс“ денеска интервенираше екипа на Брза помош, која беше повикана поради влошената здравствена состојба на првообвинетиот Дејан Јованов Деко, сопственик на дискотеката „Пулс“.

Медицинската екипа дојде за време на паузата на судењето.

– И покрај жалбите за укинување на мерката притвор, таа не беше укината и беше вратен во притворски услови. Таму се третираше импровизирачки од страна на нестручни медицински лица кои што придонесоа во петокот, на 17 април, да му биде извршена втора операција поради јавен голем црвен оток, полн со гнојна содржина. Поради тоа бил веднаш спроведен на итна операција. Денеска на најнехуман начин беше спроведен директно од болница на судење иако во таква состојба тој треба да биде хоспитализиран. Неговата рана е отворена и подложна на дополнителна инфекција. Не е сошиена бидејќи би можела дополнително да собира гнојна содржина. Од овие причини, одбраната јавно апелираше и го истакна овој предлог пред судечкиот совет бидејќи по писмен пат нема никаква реакција – објасни неговата адвокатка Ивана Коцевска на паузата од денешното рочиште.

- Advertisement -

Претходно одбраната на Јованов побара да му биде заменет затворскиот притвор со домашен, поради сериозно и алармантно влошување на неговата здравствената состојба. Адвокатката Ивана Коцевска рече дека судот е запознаен со здравствената состојба на обвинетиот кој денеска бил спроведен од болница со отворена рана после оперативен зафат.

– Таму сите лекари рекоа дека се потребни три дена мирување. Тие се поминати и затоа е денеска спроведен. Немаме такви сознанија од затворскиот лекар, а ние постапуваме по тоа – изјави судијката Дијана Груевска Илиевски.

Јавното обвинителство рече дека ги сослушале наводите на одбраната и по разгледување на документацијата на крајот од денешната расправа ќе се произнесат за барањето, но во меѓувреме здравствената состојба на обвинетиот дополнително се влошила, по што била повиката Итна помош.