Трамп им се заканува на Германија и Франција: Пуштете го дизелот во оптек или соочете се со забрана

Владата на САД ги предупреди Германија и Франција да ги пуштат во оптек своите итни резерви на дизел за да помогнат во намалувањето на глобалните цени на горивото, во спротивно се соочуваат со можна американска забрана за извоз на ова гориво – открија тројца официјални претставници за Ројтерс.

Ова предупредување претставува ескалација на притисокот врз Европа од страна на администрацијата на Доналд Трамп, која размислува за воведување таква забрана со цел да ги намали цените на горивото во САД. Американците наскоро, за нешто повеќе од еден месец, ќе излезат на гласање на меѓуизборите, на кои Трамп и неговите сопартијци републиканци би можеле да го загубат мнозинството во двата дома на американскиот Конгрес.

Американската влада е особено незадоволна од Франција и Германија, бидејќи официјални лица од САД сметаат дека тие не ги исполниле целосно претходните обврски за пуштање во оптек на итните резерви на нафта и нафтени деривати.

- Advertisement -

„Во најдобар интерес на Европа е да соработува со САД додека бараме различни начини за зголемување на понудата на нафтени деривати и намалување на трошоците за потрошувачите“, изјави еден од изворите за Ројтерс.

Втор извор, лоциран во една европска престолнина, наведе дека САД побарале од ЕУ да пушти во оптек 120 милиони барели дизел во текот на следните шест месеци.

Европа станува сè позависна од американското гориво по воведувањето на забраната за увоз од Русија поради нејзината инвазија врз Украина, како и откако конфликтот меѓу САД и Израел од една страна и Иран од друга страна го попречи снабдувањето од Блискиот Исток.