Телата на екипажот пронајдени по падот на хеликоптерот: Пилотот пристигна од странство за да помогне

Извлечени се телата на пилотот чиј хеликоптер експлодирал и се урнал по судар со друг хеликоптер за време на противпожарна мисија во Грција, потврди грчката противпожарна служба.

Пилотот бил Данец, а копилотот Грк, јави државната телевизија ЕРТ. Нивната смрт го зголеми бројот на жртви од шумските пожари во Грција на пет, откако минатата недела тројца пожарникари загинаа на Крит и на Пелопонез.

ЕРТ емитуваше снимка на која се гледа како роторот на еден хеликоптер удира во друг авион, а потоа експлодира и паѓа на земја во пламен.

- Advertisement -

Двајца членови на екипажот во вториот хеликоптер преживеале откако пилотот принудно слетал, објави телевизијата. Хеликоптерите се судриле при гаснење на пожар западно од Атина.

Во реонот кај селото Псата е започната голема операција за пребарување и спасување, соопшти противпожарната служба.

Во меѓувреме пламенот на силниот пожар на околу 50 километри западно од Атина се прошири на неколку километри од градот Мегара, кој има околу 36.000 жители.

Според првичните проценки, повеќе од 10.000 хектари шума – како и куќи, плевни и земјоделско земјиште – се уништени од петокот, објави ЕРТ.

Стотици работници за итни случаи, вклучително и пожарникари од Романија и Франција, се борат со големиот пожар што беснее околу густо пошумениот планински венец Китаирон.

Инспекторите се сомневаат дека пожарот би можел да биде предизвикан од искри од електрични водови кои припаѓаат на приватна мрежа на ветерни електрани. Во врска со истрагата се уапсени две лица.

„Постојат ситуации кога природата и интензитетот на временските настани ги надминуваат човековите планирања и оперативни способности“, напиша премиерот Киријакос Мицотакис на Фејсбук.

Бројни села беа повикани да се евакуираат со СМС сигнали. Додека пожарникарите се бореа со пламените јазици, членовите на групите за заштита на животните се обидуваа да ги преместат домашните миленици, добитокот и дивите животни на безбедно од пожарните зони, објави порталот Етнос.

Ветровите се очекува да се смират во понеделник, иако властите предупредија дека опасноста од пожари околу Атина останува многу висока.