На почетокот од својот мандат, новиот претседател на Фудбалската Федерација на Македонија (ФФМ), Масар Омерагиќ, јасно нагласи дека еден од приоритетите во неговото работење ќе бидат младинските категории. Меѓутоа, на прашањето за состојбата на Академијата на ФФМ, која е тесно поврзана со младинскиот фудбал, Омерагиќ изрази воздржаност.
Видео од внатрешноста на ФФМ Академијата открива траорни услови во кои со години живееле и тренирале најдобрите млади фудбалери на Македонија. Овие деца, одбрани да бидат дел од престижниот УЕФА проект, биле принудени да се соочуваат со занемарени и несоодветни услови за живот и тренинг.
Сцените од видеото ја прикажуваат состојбата на просториите – одронати ѕидови, несоодветна инфраструктура и опрема која со текот на времето била оставена на пропаѓање. Овие млади фудбалери, на возраст од 13-14 години, кои ја претставуваат иднината на македонскиот фудбал, живеат, тренираат и растат во средина која никако не одговара на нивните потреби.
Новото раководство на ФФМ вети дека реконструкцијата на Академијата ќе биде приоритет. Оваа институција, која своевремено беше гордост на Федерацијата и пример за останатите, сега е симбол на негрижа и срам.
„Не смееме да дозволиме младите фудбалери да продолжат да живеат и тренираат во вакви услови. Ова е прв чекор кон враќање на стариот сјај на Академијата и обезбедување на иднина за македонскиот фудбал“, стои во соопштението на Федерацијата.
Реконструкцијата ќе опфати не само обновување на постојните капацитети, туку и модернизација на условите за живот и тренинг, за да се врати репутацијата на оваа Академија како пример за развој на млади таленти во регионот.
Ситуацијата со Академијата на ФФМ е уште еден потсетник за важноста на одговорното управување и вложувањето во младите генерации. За многумина, оваа реконструкција не е само потреба, туку и морална обврска кон младите фудбалери кои со своите напори и талент се обидуваат да донесат успех и гордост на македонскиот фудбалски терен.
