Светско чудо во 21 век, Гостивар доби техничка вода, а среќата на граѓаните нема крај

Во една обична, сива, 2026 година, додека остатокот од светот се бори со вештачка интелигенција, вселенски летови и квантни компјутери, Гостивар постигна историски исчекор кој ќе се памети со генерации, водата од чешмите официјално стана техничка.

Да, добро прочитавте, техничка. Не пивка, не за готвење, туку токму онаа категорија вода која инаку служи за миење на алатки, ладење мотори и, ете сега веројатно и за туширање граѓани кои со право очекувале нешто повеќе од основно човеково право во 21 век.

Министерот за внатрешни работи, Панче Тошковски, со тон на човек кој штотуку измислил атомска бомба, а не соопштил дека граѓаните конечно смеат да се капат, изјави дека по неколкукратни испитувања, стручните лица утврдиле, водата може да се користи за хигиенски потреби. Пиењето и готвењето, велат, ќе почекаат уште малку, можеби до следната серија анализи, можеби до следниот мандат.

- Advertisement -

Тошковски не пропушти да заблагодари на гостиварчани за нивното разбирање, оти навистина, кој друг народ во Европа би им се заблагодарил на своите граѓани што со недели трпеле без чиста вода, а притоа тоа да звучи речиси како комплимент.

Стручните тимови зедоа шест примероци, ги тестираа три дена по ред, и конечно решија да и дадат на водата статус техничка, што во преводот на обичен народски јазик значи, добра е за миење садови, но не се обидувај да ја пиеш, освен ако немаш итна желба да ја провериш издржливоста на твојот стомак.

Во меѓувреме, министерот најави дека продолжува испораката на флаширана вода, зборот флаширана очигледно исто така сè уште чека финална потврда.

Ова е приказна достојна за учебниците, не за квалитетот на водоводната инфраструктура, туку за уметноста на пиар соопштенија, каде секое мало олеснување се презентира како тријумф, а срамот успешно се преправа во добра вест.

Затоа, драги гостиварчани, капете се слободно, миете садови без грижа, а водата за пиење, таа е веројатно некаде на пат, во некоја паралелна временска линија во која инфраструктурата функционира како што треба.

С.Денесовски