СО СВЕЧЕН НАСТАН ВО ЛЕСКОЕЦ ОДБЕЛЕЖАНИ 85 ГОДИНИ ОД ДЕНОТ НА НАРОДНОТО ВОСТАНИЕ

Во пресрет на 11 Октомври – Денот на народното востание, денеска во Културниот дом во село Лескоец се одржа свечениот настан „Од востание до независност – 85 години борба, 35 години независност“.

На настанот кој беше во организација на Општина Охрид, свое обраќање имаше градоначалникот, Кирил Пецаков.

– „На 11 Октомври, пред 85 години, македонскиот народ избра храброст. Тоа беше денот кога надежта за слобода прерасна во одлучност, а одлучноста во борба која остави траен белег во нашата историја.

Овој голем празник е симбол на стремежот за достоинство и сведоштво за хероите кои во најтешките времиња се спротивставија, се жртвуваа и истрајаа во својот идеал за слободна Македонија. Нивното дело не треба да го паметиме само како дел од минатото, туку и како вреден аманет за иднината.

Во народноослободителната борба, Охрид и Дебрца имаат своја важна страница. Овие наши простори не останаа неми сведоци на времето, туку активно учествуваа во отпорот и ја платија својата цена за слободата. Многу борци и патриоти го избраа патот на отпорот, а за идејата за слободна Македонија многумина наши сограѓани го дадоа највредното, својот живот.

Затоа, кога денес го одбележуваме 11 Октомври, ја чествуваме и нашата локална историја, како неразделен дел од борбата за слободна татковина.

Почитувани, историјата не учи дека големите промени секогаш започнуваат со луѓе кои веруваат во подобро утре. Денес, таа одговорност е кај нас. Ние мораме да бидеме генерацијата која будно ќе го чува наследството што го добила и ќе остави нешто вредно за поколенијата што доаѓаат.

11 Октомври е наше потсетување дека слободата не е само право, туку и обврска, секојдневно да создаваме општество во кое се почитува човекот и во кое младите ќе ја гледаат својата перспектива.

Нека е вечен споменот на хероите, нека е честит Денот на народното востание! Нека е вечен Охрид и нека е вечна Македонија!“, истакна градоначалникот Пецаков.

Свеченоста беше збогатена со театарско-сценскиот перформанс на актерите Владо Дојчиноски, Перуника Киселички, Дубравка Киселички и Марија Спиркоска Илиеска, придружувани од ученици од ООУ „Ванчо Николески“. Програмата беше збогатена со настап на хорот на истоименото училиште и музичките изведувачи Ѓоко Чеменкоски, Стефан Чеменкоски, Бојан Маркоски и Никола Илиоски.

- Advertisement -

Во рамки на свечената програма утревечер во културниот центар „Култ“ ќе се одржи изложбата на уметнички дела  „Созерцанија“ на уметникот Томислав Танески. Во недела на 11-ти октомври предвидено е полагање на свежо цвеќе на спомен обележјата на народното востание.