Македонија до среда ќе биде под влијание на снежни врнежи, кои ќе бидат посилни во западните и југозападните предели во вторник, а во среда снег ќе провејува на повеќе места низ државата. Потоа облачноста постепено ќе се намалува, но студот ќе остане присутен, предизвикувајќи арктички услови низ целата земја, информираат од УХРМ.
Според метеоролозите, минималните температури во утринските часови ќе се движат околу -10 степени, а на некои места и до -15 степени. Дневните температури, особено во централните и југоисточните предели, ќе бидат за неколку степени над нулата, додека во останатите делови ќе останат околу, па дури и под нулата.
Во Скопје се очекуваат утрински температури до -5 степени, а дневните ќе се движат меѓу 2 и 4 степени. И во главниот град, до среда ќе има услови за провејување на снег, но врнежите ќе бидат послаби.
„Овој арктички бран, кој потекнува од северните поларни предели, ќе ја задржи Македонија во стегите на студот до крајот на работната недела. Голомразицата ќе биде значителен предизвик за возачите, особено на планинските превои, каде што ќе биде потребна крајна внимателност“, велат метеоролозите.
Тие предупредуваат дека ваквите ниски температури, во комбинација со снегот, значително ќе ја зголемат лизгавоста на патиштата, што претставува ризик и за возачите и за пешаците.
Во деновите после среда, постепеното расчистување на облаците нема да значи и олеснување на температурите, кои ќе останат ниски и ќе продолжат да предизвикуваат проблеми низ целата земја.
Граѓаните се предупредуваат да бидат внимателни при движење и да избегнуваат патување ако не е неопходно. Возачите треба да бидат подготвени со соодветна зимска опрема и да внимаваат на условите на патиштата. Пешаците, пак, се советуваат да избегнуваат замрзнати површини за да спречат падови и повреди.
