Речиси 5.000 вработени поврзани со роднински врски, милионски загуби, сомнежи за кражба на гориво и работници кои бегаат од работните места прескокнувајќи ограда. Ова се дел од откритијата во едно од најголемите јавни претпријатија во Романија, чие работење се најде под посебна контрола поради сериозните финансиски проблеми.
Станува збор за компанијата СТБ, задолжена за јавниот превоз во Букурешт, над која во текот на летото беше воведена стечајна управа. Претпријатието има долг од дури 561 милион евра, а само во првите десет месеци од годинава забележало оперативна загуба од 143 милиони евра.
Стечајниот управник Ремус Борза изнел податоци кои укажуваат на долгогодишни неправилности во работењето на компанијата.
Според неговите податоци, дури 4.876 вработени се меѓусебно поврзани со роднински врски. Меѓу нив има 1.400 брачни парови, додека во дури 30 семејства во истото претпријатие работат повеќе од десет членови.
Борза ја опишал СТБ како своевидна семејна компанија, наведувајќи дека во одредени случаи на еден член од семејството му доаѓале уште дваесетина вработени роднини.
Особено загрижувачки се наодите поврзани со потрошувачката на дизел-гориво.
Според податоците што ги презентирал стечајниот управник, пријавената потрошувачка на гориво била дури 20 проценти поголема од реалната, што годишно ја чинело компанијата околу шест милиони евра.
Борза тврди дека горивото со години систематски се крадело, а дополнителни неправилности биле откриени при споредба на патните налози со податоците од возилата.
Рачно пополнуваната документација прикажувала околу пет милиони километри повеќе годишно отколку што регистрирале инструментите во автобусите и другите возила.
Во исто време, вработените минатата година вкупно поминале дури 176.000 дена на боледување. Стечајниот управник изразил сомневање дека дел од возачите за време на отсуството можеби работеле за туристички агенции.
Не помалку необични се и наодите од погоните за одржување на возилата. Според Борза, овој сектор во првите десет месеци од годинава реализирал само 39 проценти од планираните поправки.
При една ненајавена контрола, спроведена околу 9:30 часот наутро, раководството не затекнало ниту еден од 500-те механичари на нивните работни места.
Уште понеобична ситуација се случила при друга посета, кога околу 30 работници, штом ја забележале контролата, побегнале од погонот прескокнувајќи ја оградата. Борза претпоставува дека се исплашиле од можноста да пристигне полицијата.
Дополнителен проблем е тоа што компанијата, и покрај големиот број вработени во секторот за одржување, нема соодветна дозвола за поправка на мотори и менувачи.
Стечајниот управник укажал и на честите судири при паркирањето и излегувањето на автобусите од пероните. Според неговите наводи, секојдневно се кршат по три до четири ветробрански стакла. Тој изразил сомневање дека ваквата практика им оди во прилог на приватните сервиси кои ги вршат поправките.
Пред воведувањето на стечајната управа, СТБ имала 9.224 вработени, а од градскиот буџет добивала субвенции за јавниот превоз кои, според достапните податоци, достигнувале околу половина милијарда евра.
По утврдувањето на состојбата во компанијата, Борза поделил 796 откази и укинал уште 919 непополнети работни места.
Меѓу укинатите позиции биле работните места на курири, ложачи, статистичари и секретари, а бил намален и бројот на шалтерски работници.
Според оценката на стечајниот управник, компанијата имала и премногу возачи и кондуктери во однос на бројот на возила. На околу 1.250 возила имало вработено 4.358 возачи и кондуктери.
За сериозната финансиска состојба се огласил и градоначалникот на Букурешт, Чипријан Чуку, кој оценил дека СТБ со години ги натрупувала финансиските проблеми.
Тој најавил обид да се спаси компанијата од банкрот, уверувајќи ги граѓаните дека проблемите со солвентноста нема да го загрозат функционирањето на јавниот превоз.
Дополнително внимание привлекуваат и податоците дека во компанијата биле издадени околу 3.000 потврди за професионални заболувања, од кои околу 2.000 резултирале со предвремено пензионирање на вработени поради инвалидитет.
Така, претпријатието кое треба да обезбеди секојдневен превоз за жителите на романската престолнина стана пример за сериозни проблеми во управувањето со јавните пари, додека новото раководство се обидува да го спречи неговиот финансиски колапс.
ОhridSky е ваш доверлив извор за сеопфатно и избалансирано покривање на вестите. Со посветеност на интегритет и точност, обезбедуваме длабинско известување кое ги открива приказните што се најважни.
© 2025 OhridSky. Сите права задржани.
Please login or subscribe to continue.
No account? Register | Lost password
✖✖
Are you sure you want to cancel your subscription? You will lose your Premium access and stored playlists.
✖
