Синот на поранешниот канадски премиер го искористи славниот пар за промоција на својата нова песна

Ксавиер Трудо, најстариот син на поранешниот канадски премиер Џастин Трудо, пронајде несекојдневен начин да ја промовира својата нова песна „Downtown“. Во видеото што го објави на социјалните мрежи, неговиот татко и Кејти Пери танцуваат во продавница за железарија, а главниот реквизит е огромен отпушувач за одвод.

Во видеото Кејти Пери ја приближува камерата кон звучникот во продавницата, додека Ксавиер напишал: Видео со реакцијата на мојата нова песна DOWNTOWN. Откако започнува мелодијата, во кадар се појавува Трудо, кој танцува низ продавницата, носи очила за сонце и мавта со огромен гумен отпушувач за одвод. На крајот се појавува и 41-годишната Пери, која танцува додека ја држи камерата.

– Сега е достапна на сите стриминг-платформи – напиша Ксавиер.

- Advertisement -

Ксавиер е најстарото од трите деца што Џастин Трудо ги има со поранешната сопруга Софи Грегоар. Младиот музичар неодамна откри дека славата на неговото семејство му создавала притисок.

– Чувствував притисок. Мислам дека токму затоа сакав да направам нешто сосема поинакво и, очигледно, да го променам животот на луѓето, но на свој начин… Создавањето ново име за себе и тоа да бидам свој човек ми беше многу важно – изјавил тој во интервју за „GQ“.

Претходно, тој објави и видео во кое ја преслушува песната заедно со својата мајка додекаседат во автомобилот.

Во меѓувреме, неговиот татко Џастин повторно предизвика внимание со изборот на фотографии од изминатите недели, меѓу кои и една семејна фотографија со поранешната сопруга и нивните три деца, но и снимка на која тој и Кејти Пери уживаат заедно со пиво во рака.

– Благодарен сум за моментите што го направија ова лето толку посебно и за луѓето со кои можев да ги споделам – напиша тој.

Трудо и Пери се во врска нешто повеќе од една година, откако минатото лето беа забележани заедно на вечера во Монтреал. Половина година подоцна, во декември, тие практично ја потврдија врската и на Инстаграм. Парот ова лето за првпат се појави заедно на црвениот тепих на 25. Фестивал „Трибека“, каде што присуствуваа на премиерата на концертниот филм „Katy Perry: The Lifetimes Tour – Live from Paris“. Пејачката тогаш за „People“ изјави:

– Чувствувам дека сум многу поцврсто втемелена личност во многу аспекти од мојот живот. Многу сум вљубена.

Пред врската со Трудо, Пери девет години беше во врска со актерот Орландо Блум, со кого ја има петгодишната ќерка Дејзи. Двајцата почнаа да се забавуваат во 2016 година, се свршија во 2019 година, но никогаш не стапија во брак. По раскинувањето, нивните претставници истакнаа дека односот го насочиле кон заедничкото родителство. Пери претходно беше кратко во брак со комичарот Расел Бренд, од 2010 до 2012 година.

Во меѓувреме, Џастин Трудо со поранешната сопруга Софи има три деца – Ксавиер, 17-годишната Ела-Грејс и 12-годишниот Хадриен. Тие беа во брак 18 години, пред во август 2023 година да објават дека се разделуваат.