Силна бура предизвика хаос во Холандија

Силна бура што го зафати јужниот дел на Холандија однесе човечки живот и предизвика голема материјална штета. Во градот Бокстел загина возач откако дрво паднало врз неговиот автомобил, додека леден град оштетил бројни камперски приколки и шатори во покраината Северен Брабант.

Општинската комунална служба во Бокстел соопшти дека несреќата се случила во вторникот попладне, кога силните ветрови урнале скапано дрво врз возило во движење. Возачот починал на местото на несреќата.

По трагедијата, локалните власти најавија вонредни проверки на високите дрвја во областа за да се утврди дали постои опасност од нивно паѓање при идни невремиња, објави „NL Times“.

- Advertisement -

Голема штета е пријавена и во кампот „Де Бонте Крај“ во Рамсдонк, каде што силен леден град ги пробил покривите на камперските приколки, а речиси сите шатори биле урнати или оштетени.

Холандскиот метеоролошки институт (KNMI) денеска издаде жолто ниво на предупредување за југоисточниот дел од земјата поради очекувани обилни врнежи, грмежи и нови бури.

Властите ги повикаа граѓаните да бидат внимателни и да ги следат официјалните предупредувања, бидејќи нестабилното време може да предизвика дополнителни проблеми во погодените региони.