Шестмина мигранти загинаа во близина на островот Лезбос по судир меѓу глисер и пловило на крајбрежната стража

Грчките власти соопштија дека шестмина мигранти, меѓу кои и едно бебе, загинале рано утринава во близина на островот Лезбос, откако глисерот со кој патувале од Турција се судрил со пловило на грчката крајбрежна стража, по што се превртел.

Несреќата се случила на приближно 3,5 наутички милји јужно од Агрилија на Лезбос.

Од крајбрежната стража изјавија дека спасувачите ги извлекле телата на четворица мажи, една жена и едно бебе, додека осум лица преживеале и се пренесени во болница, пренесува Ројтерс.

- Advertisement -

Грчките власти – кои прогласија политика на „нулта толеранција“ кон криумчарите на мигранти – уапсија 37-годишен турски државјанин меѓу преживеаните; тој е идентификуван како осомничен во операцијата за криумчарење и како лицето кое управувало со пловилото.

Грчкиот министер за поморски прашања, Василис Кикилијас, изјави дека првичната истрага укажува оти глисерот со својот прамец удрил во левата страна на пловилото на крајбрежната стража. „Нашиот став е непроменлив: нулта толеранција кон криумчарите“, напиша тој во објава на платформата X.