Северна Кореја истрела балистичка ракета во Јапонското Море за време на посетата на американскиот државен секретар Ентони Блинкен во Сеул во Јужна Кореја, информираат јужнокорејските воени сили.
Ова е прв ракетен тест на Северна Кореја по два месеца.
Блинкен за време на посетата рече дека Русија би можела да го признае нуклеарниот статус на Северна Кореја, но и да ѝ достави напредно оружје.
– КНДР веќе добива руско воено оружје и обука. Имаме причина да веруваме дека Москва планира да сподели напредни технологии за сателити со Пјонгјанг – рече Блинкен на прес-конференција во Сеул.
Бликен и неговиот јужнокорејски колега Чо Те-Џул на заедничката прес-конференција го осудија тестирањето на балистичка ракета од Северна Кореја, нагласувајќи дека тоа ги прекршува резолуциите на Обединетите Нации.
Според последните информации, станува збор за ракета со среден дострел. Јапонската крајбрежна стража потврди дека ракетата паднала надвор од ексклузивната економска зона на Јапонија.
Посетата на Блинкен се одвива во време на политичка криза во Јужна Кореја, каде Парламентот го отстрани од функцината претседателот Јун Сук-Јеол поради воведувањето на краткотрајна воена состојба минатиот месец.
