Меѓународниот аеродром Скопје од оваа година добива две нови директни авиолинии до Женева и до Париз (аеродром Орли), кои ќе ги оперира компанијата „Изиџет“.
Овие линии се воведени на барање на дијаспората и претставуваат значаен чекор во развојот на македонскиот авиосообраќај, истакна вицепремиерот и министер за транспорт Александар Николоски.
Првата линија, Скопје – Париз, ќе започне со работа на 2 април, додека линијата Скопје – Женева ќе биде достапна од 3 ноември.
Овие нови авиолинии се овозможени преку финансиската поддршка на Владата на Република Северна Македонија, преку Министерството за транспорт. Тие се дел од отворениот јавен повик за поддршка на воведување нови дестинации, кој останува отворен за сите заинтересирани авиокомпании што ги исполнуваат предвидените критериуми.
– Ова е уште една одлична вест за граѓаните, за авиосообраќајот и за државата. Париз и Женева се атрактивни дестинации за нашите граѓани, особено за оние од дијаспората. Веруваме дека ќе поттикнеме и други авиокомпании да се пријават на јавниот повик. Дополнително, новите линии ќе ја зголемат конкурентноста на нашите аеродроми во регионот – изјави Николоски.
Со овие две нови дестинации, бројот на нови линии што ги поддржа Министерството за транспорт се зголемува на девет. Претходно беа воведени следните линии:
- Охрид – Истанбул
- Охрид – Базел-Мулхаус
- Скопје – Дубаи
- Скопје – Штутгарт
- Скопје – Лион
- Скопје – Барселона
Финансиската поддршка се спроведува по принципот „по патник во доаѓање“, што придонесува за стимулирање на поголем патнички сообраќај кон Македонија.
Овие мерки не само што обезбедуваат нови дестинации за граѓаните, туку и го олеснуваат патувањето за дијаспората, која ќе има поблизок и поекономичен пристап до своите блиски во татковината. Владата истакнува дека развојот на авиосообраќајот останува еден од приоритетите за зголемување на поврзаноста и економскиот развој на земјата.
