Се подготвува закон за системот на плати во јавниот сектор

Системот на плати во јавниот сектор денес сè уште се карактеризира со различни правила, процедури и практики меѓу институциите. Тоа создава нееднаквости и ја отежнува примената на јасни и единствени стандарди за вреднување на работата. Затоа, воспоставувањето поусогласен, транспарентен и праведен систем на плати е една од важните реформи на кои Министерството за јавна администрација посветено работи, рече министерот Горан Минчев, на TAIEX експертска мисија посветена на воспоставување единствен и усогласен систем на плати во јавниот сектор.

Во насока на оваа реформа, денеска почнала петдневна TAIEX експертска мисија посветена на воспоставување единствен и усогласен систем на плати во јавниот сектор, соопшто Министерството.

Мисијата ја отворијаминистерот за јавна администрација, Горан Минчев и вршителката на должноста амбасадор на Грција, Христина Василату. Експерти од грчкото Министерство за национална економија и финансии ќе го пренесат искуството од грчкиот единствен систем на исплата, модел кој овозможува централизирано и усогласено управување со исплатите во јавниот сектор.

- Advertisement -

– Нашата цел е јасна, да воспоставиме систем во кој правилата ќе бидат јасни и еднакви за сите, а принципот „еднаква плата за еднаква работа“ да биде реално применлив во целиот јавен сектор – порача министерот Минчев.

Министерството работи на новата законска рамка за системот на плати. Се очекува законското решение да биде готово до крајот на 2026 година, а неговото постепено и систематско спроведување да започне во 2027 година.

Минчев вели дека ние не сакаме да копираме туѓ модел.

– Сакаме да го разбереме, да го анализираме и врз основа на нашите институционални, законски и финансиски услови да изградиме решение кое ќе биде функционално и применливо – рече тој.

Според Минчев, целта е да се создаде систем што нема само да ги поедностави процесите, туку ќе донесе поголема транспарентност, подобра контрола на јавните средства и поквалитетни податоци за носење јавни политики.

За Министерството за јавна администрација, ова е конкретен чекор во реформата за градење на поефикасен и поправеден систем на плати, систем во кој правилата се јасни, одговорноста е прецизно утврдена, а јавните средства се управуваат поефикасно и потранспарентно.