Првите фотографии од венчавката на Роналдо и Георгина ги објави „Вог“

Кристијано Роналдо и Георгина Родригез официјално станаа сопружници, и тоа на начин кој малкумина го очекуваа. Двојката се венча на 11 август во својот дом во Кашкаиш, Португалија, на интимна граѓанска церемонија на која присуствувале само тие и нивните пет деца. Првите фотографии од свадбата ексклузивно ги објави „Vogue“, откривајќи атмосфера далеку од раскошните прослави што јавноста можеше да ги очекува од еден од најпознатите парови во светот.

Церемонијата се одржала во дневната соба на нивниот дом, а изборот на датумот имал посебно значење. Токму на 11 август 2016 година, Роналдо и Георгина првпат се сретнале во продавница на „Gucci“ во Мадрид, каде што таа работела како продавачка. Наместо голем спектакл со стотици гости, тие сакале моментот да биде личен и посветен на семејството.

- Advertisement -

– Беше токму како што си замислував – изјавила Георгина за „Vogue“, додавајќи дека било интимно, полно со љубов и дека семејството ја имало најважната улога.

Особено внимание привлекоа нивните свадбени комбинации. Георгина избрала бел костум од свила со здолниште и сатенски чевли, додека младоженецот носел светлобеж памучен костум со специјално изработени мокасини. И нивните деца биле усогласени со неутрални беж и бели тонови. Интересно е што облеката била инспирирана од местото каде што започнала нивната љубовна приказна – „Gucci“, брендот во чија продавница се запознале пред една деценија.

Парот ја потврди венчавката преку социјалните мрежи со фотографија на која нивните раце се споени, а на прстите се гледаат едноставни златни бурми. Објавата ја придружија со кратката порака „CG“. Иако веридбата ја објавија во август 2025 година, кога Георгина ја покажа огромната овална дијамантска бурма, тие до последен момент успеаја да ги сокријат деталите за големиот ден.

Нивната љубовна приказна трае речиси десет години и низ тој период помина низ големи радости и тешки моменти. Двајцата се родители на Алана Мартина и на Бела Есмералда, а заедно се грижат и за трите деца на фудбалерот од претходни врски – Кристијано Џуниор и близнаците Ева и Матео. Во 2022 година семејството доживеа трагична загуба кога нивниот син близнак почина при породувањето. И покрај огромната болка, Роналдо и Георгина продолжија да го градат своето семејство, а нивната поврзаност со текот на годините стануваше сè посилна.

Иако интимната церемонија во Португалија веќе е зад нив, свадбената приказна очигледно нема да заврши тука. Според информациите што ги споделија, двојката планира и поголема прослава со семејството и пријателите во иднина. Засега, сепак, најважниот чекор го направија во својот дом, со своите деца покрај нив – токму онака како што сакале.