Пријавени опасни несакани ефекти од лековите за слабеење

Според податоците на британската Регулаторна агенција за лекови и здравствени производи (MHRA), пријавени се повеќе од 150 смртни случаи поврзани со инјекциите за слабеење; сепак, агенцијата нагласува дека овие извештаи не докажуваат оти самиот лек го предизвикал фаталниот исход.

Исто така, објавено е дека пациентите кои користат лекови за слабеење поднеле околу 150.000 извештаи во врска со можни несакани ефекти и други негативни реакции.

Податоците се собрани преку системот „Yellow Card“ (Жолта картичка) на британската агенција MHRA, кој им овозможува на пациентите, членовите на нивните семејства и здравствените работници да пријавуваат несакани ефекти од лековите.

- Advertisement -

Сепак, MHRA нагласи дека извештаите во системот „Yellow Card“ не докажуваат дека некој лек предизвикал несакан ефект или смрт. Тие само укажуваат на тоа дека лицето што го пријавило случајот се сомневало во можна поврзаност.

Податоците ги опфаќаат лековите од класата GLP-1 достапни преку британската Национална здравствена служба (NHS), вклучувајќи ги лираглутид (се продава како Saxenda), семаглутид (познат како Wegovy) и тирзепатид (се продава како Mounjaro). Според податоците, за тирзепатид – активната состојка во Mounjaro – се пријавени 106.189 негативни реакции и 120 смртни случаи за кои постои сомневање дека се поврзани со лекот.

Семаглутид, пак, се поврзува со 48.089 пријавени негативни реакции и 59 смртни случаи. Тој се користи во лекот за слабеење Wegovy, но е и активна состојка во лековите за дијабетес Ozempic и Rybelsus.

Лираглутид, кој се продава како Saxenda, се поврзува со 4.491 пријавена негативна реакција и 37 смртни случаи. Исто така, се користи за лекување дијабетес под други трговски имиња.

Податоците од системот „Yellow Card“ исто така ги прикажуваат видовите на пријавени несакани ефекти. За семаглутид се евидентирани 28.884 пријави поврзани со гастроинтестинални проблеми, додека повеќе од 5.000 се однесувале на нарушувања на нервниот систем.

За тирзепатид се евидентирани 65.024 пријави за гастроинтестинални проблеми и 13.964 пријави за нарушувања на нервниот систем. Повеќе од 2.000 пријави се однесувале на психијатриски нарушувања.

За лираглутид, евидентирана е 1.461 пријава поврзана со гастроинтестинални проблеми. Честите несакани ефекти од инјекциите за слабеење вклучуваат гадење, повраќање, дијареја, запек и киселински рефлукс.

Во некои случаи, овие лекови се поврзуваат и со кардиоваскуларни проблеми, нарушувања на нервниот систем, проблеми со очите и посериозни гастроинтестинални состојби, од кои некои резултирале со смрт.„Како и кај сите лекови, безбедноста на лековите од групата GLP-1 постојано се следи, вклучително и преку нови сознанија од спонтани пријави и научни публикации. Пациентите и здравствените работници навремено ќе бидат информирани за какви било промени во врска со безбедноста на овие лекови, а ќе се преземат и соодветни мерки за ублажување на сите идентификувани ризици“, изјави портпарол на MHRA, како што пренесува „Индипендент“ (The Independent).

„Врз основа на моментално достапните докази, придобивките од агонистите на GLP-1 рецепторите ги надминуваат потенцијалните ризици кога се користат во согласност со одобрените индикации.“