Познатата плажа Ла Пелоса на италијанскиот остров Сардинија воведе нови правила за посетителите, вклучувајќи забрана за употреба на пешкири

Познатата плажа Ла Пелоса на италијанскиот остров Сардинија воведе нови правила за посетителите, вклучувајќи забрана за употреба на пешкири. Целта е да се заштити уникатен екосистем, а за прекршување на прописите се предвидени казни до 5.000 евра.

Една од најзначајните промени се однесува на сончањето. Туристите повеќе не смеат да лежат директно на традиционалните пешкири. Наместо тоа, тие можат да користат само специјални сламени или бамбусови простирки.

Властите објаснуваат дека мерката е воведена за да се намали загубата на песок, проблем што со години ги загрижува локалните власти и екологистите. Според проценките на надлежните органи, влажните крпи секојдневно задржуваат илјадници мали зрна песок, кои посетителите несвесно ги понесуваат со себе кога ја напуштаат плажата. Во текот на туристичката сезона, исчезнуваат значителни количини песок, што може да го загрози изгледот на брегот на долг рок и да го оштети чувствителниот крајбрежен екосистем.

- Advertisement -

Забранети се и популарните подлоги отпорни на песок што ги користат многу туристи за да избегнат лепење на песок на ткаенината.Властите велат дека ваквите производи не ги исполнуваат потребните критериуми за заштита на плажата и затоа не се дозволени во областа Ла Пелоса.

Дополнително, сите посетители мора да го измијат песокот од нозете во посебно одредени места пред да заминат.

Спроведувањето на правилата не е оставено на случајност. Специјални инспектори секојдневно патролираат на плажата за да го следат однесувањето на посетителите и да обезбедат почитување на прописите.

Прекршувањето на правилата подлежи на казна од 100 евра, која може да се изрече на лице место.

Во текот на врвот на туристичката сезона, на плажата не се дозволени повеќе од 1.500 луѓе истовремено. Ограничувањето на бројот на посетители беше воведено за да се намали притисокот врз животната средина и да се зачува квалитетот на уникатниот природен простор.

Отстранувањето на природни материјали од плажата е особено строго казнето. Туристите кои се обидуваат да земат школки, камчиња или песок како сувенири ризикуваат многу високи казни. Тие се движат од 300 до 5.000 евра, во зависност од сериозноста на прекршокот.

Покрај ова забрането е пушење на плажата, употреба на шампони и детергенти, потоа ограничен е и престојот на миленици на плажата, фрлањето ѓубре и слично.

Во најсериозните случаи, властите дури можат да поведат и правни мерки против прекршителите.

Ла Пелоса е позната со години како една од најубавите плажи во Италија и Медитеранот, но нејзината популарност е и најголемиот предизвик. Затоа локалните власти сè повеќе ги заоструваат правилата за заштита на природната убавина што привлекува посетители од целиот свет секоја година.