ПОТРЕСНА СЦЕНА ВО СРБИЈА, ВОЗ СМАЧКА КОЛА, ЗАГИНАА МЛАДА МАЈКА И НЕЈЗИНОТО ТРИГОДИШНО ДЕТЕ

Стравична сообраќајна несреќа се случила утрово околу 9 часот на железнички премин на пругата Лалиќ–Оџаци, во Србија, кога патнички воз удрил во автомобил во кој се наоѓале млада мајка (27) и нејзиниот тригодишен син.

Од силината на ударот автомобилот бил целосно уништен – предниот дел бил откорнат, а покривот целосно згмечен. Сцените од местото на несреќата покажуваат дека по ударот возот го туркал автомобилот речиси 200 метри по пругата, а дел од распарчениот автомобил останал заглавен под самата локомотива.

Припадниците на противпожарната и спасувачката единица морале да користат специјална хидраулична опрема и да го сечат лимот од возилото за да стигнат до повредените.

- Advertisement -

– Сцените се навистина вознемирувачки. Делови од автомобилот и лични предмети се расфрлани на стотици метри долж пругата. Меѓу жителите кои пристигнуваат на местото владеат тага и неверување – јавува репортерот на „Телеграф“ од местото на несреќата.

На местото на трагедијата се голем број полициски екипи, пожарникари и надлежниот обвинител кој раководи со увидот. Иако железничкиот премин има рампа и сообраќајна сигнализација, деталната истрага треба да утврди како автомобилот се нашол на шините во моментот кога наишол возот.