Поминаа уставните измени на Орбан

Унгарските пратеници на 15 април изгласаа уставен амандман со кој ќе се признаваат само два пола, машки и женски, и со кој се ограничува правото на ЛГБТК+. Ова меѓу другото, значи и дека по 30 години може да биде забранет Маршот на гордоста во Будимпешта.

Членови и симпатизери на опозициската партија Моментум се обидоа да го попречат гласањето со блокирање на собранискиот паркинг и свирење за време на пленарната седница. Амандманот помина со 140 „за“ и 21 „против“.
Од доаѓањето на власт во 2010 година владата на Орбан ги забрани геј браковите, сериозно ја ограничи можноста ЛГБТК+ луѓето да посвојуваат деца и се обиде да ја изедначи хомосексуалноста со педофилија.

Амандманот исто така го гарантира правото за користење готовина на унгарските граѓани и дозволува суспензија на државјанството и протерување од земјата на Унгарците кои истовремено се државјани на земја надвор од ЕУ, доколку се смета дека тие личности претставуваат закана за јавниот ред и националната безбедност на земјата.