„Пољуд“ ќе пее за Мишо Ковач, потоа неговите посмртни останки тргнуваат кон Загреб

Музичкото испраќање на Мате Мишо Ковач кое почнува попладнево (3 ноември), на сплитскиот стадион „Пољуд“, го организираат фудбалскиот клуб „Хајдук“, навивачката група Торцида и Хрватската музичка унија, а интересот е огромен и сите 34.000 бесплатни билети се веќе поделени.

На сцената ќе настапат пејачи и музичари кои биле блиски со Ковач и ја почитувале неговата работа, а ќе ги придружува оркестар составен од сплитски музичари. Се очекува и публиката да ги преземе песните и заедно да ги испее неговите најголеми хитови.

Еден од најемотивните моменти е предвиден кон крајот на програмата, кога возило со ковчегот на Ковач ќе влезе на стадионот и ќе помине по атлетската патека околу фудбалскиот терен, за сите присутни да можат да се простат од него. По музичкото испраќање на „Пољуд“, ковчегот со посмртните останки на Мишо Ковач ќе тргне на пат кон Загреб, каде што утре (4 ноември) ќе биде погребан на гробиштата Мирогој, покрај својот син Еди. Поворката ќе се движи по јадранската магистрала, покрај Шибеник и други далматински градови, каде што обожавателите ќе имаат можност да му оддадат последна почит. Потоа поворката ќе продолжи кон Шибеник, неговиот роден град, а оттаму кон Загреб.

- Advertisement -

Врската на Мишо со „Пољуд“ и „Хајдук“ беше многу повеќе од љубов на еден пејач кон фудбалски клуб. Како момче сонувал дека еден ден ќе застане на голот на сплитскиот тим, а уште во педесеттите години патувал од Шибеник до Сплит за да ги гледа натпреварите. Иако подоцна живееше во Загреб, никогаш не ја криеше приврзаноста кон клубот и често велеше дека е најсилниот навивач на „Хајдук“ во хрватската престолнина.

На истиот стадион во 1993 година одржа и еден од најзначајните концерти во кариерата – „Ноќ на свеќите“, пред околу 40.000 луѓе. Настапот се случи во еден од најтешките периоди од неговиот живот, по трагичната смрт на синот Еди, но и во времето на Татковинската војна.

Неговите песни со децении беа дел од навивачката традиција на „Хајдук“, а стиховите од „Ja ne mogu drugo nego da ga volin“, во преработена верзија посветена на клубот, станаа препознатлив дел од атмосферата на „Пољуд“.

Мишо Ковач почина на 31 октомври, на 86-годишна возраст, во Подстрана, во близина на Сплит. Владата на Хрватска го прогласи денешниот ден за Ден на национална жалост. Погребот на Мирогој во Загреб ќе се одржи утре, 4 ноември, во најтесниот круг на семејството, а комеморацијата во малата сала на концертната сала „Ватрослав Лисински“ е закажана за 11 ноември.