ПО 5 НЕДЕЛИ ШПАНИЈА ГИ ИЗБРКА ДЕМОНСТРАНТИТЕ ОД ШАТОРИТЕ ВО МАДРИД

Шпанската полиција рано утрово ги отстрани преостанатите демонстранти и шатори од главниот плоштад во Мадрид, соопштија официјални лица.

Британските медиуми пренесуваат дека повеќето од луѓето што протестираа против вртоглаво зголемените кирии, недостигот од станови и присилните иселувања веќе доброволно го напуштија местото.

Со полициската операција, спроведена пред разденување, затворен е петнеделниот камп на плоштадот Пуерта дел Сол во Мадрид, што стана симбол на кризата со домувањето во Шпанија и придонесе за одлуката на премиерот Педро Санчез да распише предвремени парламентарни избори за 29 ноември.

- Advertisement -

Протестите започнаа по иселувањето на 87-годишна жена, која подоцна почина, а маршеви беа организирани низ цела Шпанија на покана на здружението на станари.

Слични кампови се појавија на плоштадите и во другите поголеми шпански градови, како и во соседна Португалија. Кампот на плоштадот во Мадрид прерасна во минијатурен град, со свои „улици“, информативни точки, културни објекти и организирана дистрибуција на храна.

Припадниците на полициските сили за сузбивање демонстрации рано утрово, околу 3 часот, почнаа да ги отстрануваат преостанатите 334 лица од кампот. Притоа две лица беа уапсени за непослушност и отпор кон полицајците, соопшти канцеларијата на претставникот на централната влада во Мадрид.

Во операцијата учествуваа околу 400 полицајци, со поддршка на пожарникари и служби за социјална помош, се додава во соопштението.

Демонстрантите на нивниот канал на Телеграм изјавија дека отстранувањето на кампот било насилно и дека неколку лица биле повредени откако биле претепани и нападнати со бибер спреј.

Во посебна изјава, владата изјави дека немало насилство или инциденти.

На снимки од утринава може да се види како градските работници го чистат плоштадот со црева за вода, отстрануваат графити од спомениците и отстрануваат големи пластични церади што биле закачени меѓу столбовите на уличните светилки.

Претставници на демонстрантите соопштија дека на 30 октомври ги распуштија своите организациски комитети, со оглед на тоа што нивното првично барање беше исполнето откако владата усвои низа мерки за домување.

Наместо тоа, тие планираа да се фокусираат на генерален штрајк, закажан за 11 ноември, поради правата за домување и трошоците за живот.

Според владата, голем број луѓе кои сè уште спиеле таму биле бездомници или припаѓале на други ранливи групи.