Победата на крајнодесничарската АфД на покраинските избори во Германија е огромна, но власта во Саксонија сè уште не е на дофат

Победата на крајнодесничарската АфД на покраинските избори во Германија е огромна, но власта во Саксонија сè уште не е на дофат. Преброените гласови покажаа дека партијата нема доволно пратеници за самостојно да управува со Саксонија-Анхалт. Сега почнува потешкиот дел, да се најде партнер или поддршка за влада.

Главниот кандидат на АфД во покраината, Улрих Зигмунд, досега ја отфрлаше можноста да предводи малцинска влада. Но, националните лидери на партијата не ја затворија таа врата.

Истовремено, Зигмунд испрати сигнал и кон пратениците на ЦДУ, партијата на актуелниот канцелар Фридрих Мерц. Зигмунд рече дека е подготвен да соработува со поединечни пратеници или со партијата.

Мерц го почувствува изборниот удар

- Advertisement -

Токму демохристијанската десница ЦДУ излезе како големиот губитник на изборите. Партијата на Мерц загуби повеќе од половината од поддршката што ја имаше пред пет години.

Покраинскиот лидер на ЦДУ, Свен Шулце, го призна поразот.

– Овој резултат ни кажува многу. Народот испрати јасна порака и ние мора да ја препознаеме таа порака – рече Шулце.

Копретседателката на АфД, Алис Вајдел, веднаш го насочи ударот кон Берлин. Таа прогнозираше дека Мерц ќе биде сменет и дека Германија ќе оди на предвремени федерални избори „пред Божиќ“.

Може ли да падне заштитниот ѕид?

Тука почнува вистинската политичка математика. ЦДУ и другите големи партии повторно ја отфрлија коалицијата со АфД.

Тие продолжуваат да го применуваат таканаречениот „заштитен ѕид“. Со него традиционалните партии ја исклучуваат соработката со АфД.

Зигмунд, сепак, јавно им подаде рака на политичките сили што се подготвени за промена. Копретседателот на АфД, Тино Чрупала, отиде уште подалеку. Тој порача дека партијата е подготвена да разговара со сите.

Тоа неизбежно го отвора и прашањето за ЦДУ. Коалиција меѓу АфД и партијата на Мерц математички би имала убедливо мнозинство. Политички, сепак, ЦДУ засега ја исклучува таквата можност, пишува Еурактив.

Пет пратеници може да станат клучни

Постои уште една можност. Крајната левица во Германија, Сојузот на Сара Вагенкнехт(БСВ), влезе во парламентот и може да стане важен фактор во преговорите.

БСВ остави простор за соработка со АфД по одделни прашања. Партиите имаат допирни точки околу миграцијата и односите со Русија.

Но, Зигмунд веќе ја отфрли класичната коалиција со БСВ. Ја нарече партијата „дел од проблемот, а не решението“.

Оттука се отвора необична ситуација. Победникот нема мнозинство, а речиси сите потенцијални партнери не сакаат коалиција со него. Дури и противниците на АфД тешко можат да состават стабилна влада без сложен договор меѓу идеолошки далечни партии.

Зигмунд ја спомена и последната опција

Ако не обезбеди поддршка, Зигмунд не сака АфД по секоја цена да влезе во малцинска влада. Тој веќе ја спомена можноста повторно да се оди на избори.

– Доколку е потребно, ќе има нови избори. Тогаш би добиле 50 или 55 отсто од гласовите во покраината – рече Зигмунд.

Партискиот врв, сепак, сè уште ги разгледува опциите. Токму околу малцинската влада веќе се забележуваат различни ставови меѓу покраинското и националното раководство на АфД.

Три мандати до мнозинство

Конечната математика објаснува зошто победничката прослава брзо се претвори во битка за власта.

Според прелиминарните конечни резултати, АфД освои 43,8 отсто и 39 од вкупно 83 пратенички места. За апсолутно мнозинство се потребни 42. Недостигаат само три мандати.

ЦДУ падна на 17,2 отсто и доби 15 пратеници. СПД освои 9,3 отсто, Зелените 8,9, а Левицата 8,6 отсто. Секоја од овие три партии доби по осум места. БСВ со 5,3 отсто освои пет.

Излезноста достигна рекордни 77,8 отсто.

Москва и миграцијата не се покраинска работа

Иако АфД отворено се спротивставува на натамошната помош за Украина и заговара построга миграциска политика, тие прашања не се решаваат на покраинско ниво. Евентуална влада на АфД во Саксонија-Анхалт би имала многу поголемо влијание врз образованието, културата и врз локалната полиција. Вајдел, сепак, веќе гледа кон федералната власт.

– Ќе ги намалиме сите непотребни трошоци, ќе ги контролираме нашите граници и ќе ги депортираме сите што се должни да ја напуштат земјата – порача Вајдел.