Откриени дел од 49-те лица што Вучиќ ги помилувал

Еден месец откако Александар Вучиќ соопшти дека помилувал или ослободил од кривично гонење 49 лица, судовите во Белград и во Нови Сад открија дел од нивните имиња. На списокот се поранешна висока полициска функционерка, лица обвинети за напади врз студенти, лекар обвинет за примање поткуп, како и човек против кого се водела постапка за перење пари, пренесе „Данас“.

Меѓу најпознатите имиња е Дијана Хркаловиќ, поранешна функционерка во Министерството за внатрешни работи, која беше обвинувана за поврзаност со криминални групи и против која се водеше судска постапка за трговија со влијание.

Вишиот суд во Белград потврди и помилувања на Небојша Ѓокиќ, обвинет за перење пари, Марко Павловиќ, обвинет за обид за тешко убиство, Драгана Живадиновиќ, обвинета за обид за злоупотреба на службената положба, и Милош Дугалиќ, кој во март 2025 година бил осуден на затворска казна.

- Advertisement -

Павловиќ беше обвинет затоа што со автомобил пробил студентска блокада кај Правниот факултет во Белград, при што тешко ја повредил студентката Соња Поњавиќ.

Живадиновиќ е поранешна претседателка на Вишиот суд во Ниш, позната и по ослободителната пресуда за контроверзниот бизнисмен Звонко Веселиновиќ.

Од Нови Сад се потврдени и имињата на петмина обвинети за напади врз студенти. Горски Матовиќ, Стевица Киш и Александар Коциќ се соочувале со обвиненија за насилничко однесување на јавен собир или спортски настан. Огњен Станковиќ бил обвинет и за нанесување тешка телесна повреда, а Немања Нарачи и за предизвикување општа опасност.

Истражувачката мрежа „Крик“ претходно ги споменувала Матовиќ и Киш во текст за лица од криминалното милје поврзани со Српската напредна странка.

Помилуван е и Игор Елез, лекар во Клиничкиот центар Војводина, кој беше уапсен во 2020 година под обвинение за примање поткуп.

На списокот се и дванаесеттемина од таканаречената „новосадска група“, обвинети за напад врз уставното уредување и повикување на насилна промена на Уставот. Станува збор за Ања Питулиќ, Јован Дражиќ, Дејан Багариќ, Доротеја Антиќ, Бранислав Ѓорѓевиќ, Мила Пајиќ, Давор Стефановиќ, Срѓан Ѓуриќ, Младен Цвијетиќ, Ладо Јововиќ, Марија Васиќ и Лазар Диниќ.

Активистите од оваа група го отфрлија помилувањето, тврдејќи дека постапката против нив била монтирана и дека не барале милост.

Студентското движење остро реагираше, особено на помилувањето на Павловиќ. Студентите оценија дека ваквата одлука ја поткопува довербата во институциите и претставува опасен преседан во користењето на претседателските овластувања.

Вучиќ ја соопшти одлуката на 27 септември, непосредно пред истекот на мандатот, но тогаш не ги откри сите имиња. Тој рече дека 23 од помилувањата се однесуваат на настаните поврзани со протестите, меѓу кои 12 членови на новосадската група и 11 лица вмешани во инциденти против блокадерите.

Од Министерството за правда и локалните обвинителства не одговориле на прашањата на „BBC“ дали станува збор за помилување по изречена пресуда или за запирање на кривичното гонење. Јавното обвинителство за организиран криминал на 30 октомври побарало податоци за лицата, делата и постапките.

Вучиќ претходно изјави дека документацијата ја доставил до надлежните органи и дека повеќето од помилуваните лично не ги познава.

Во меѓувреме, на социјалните мрежи кружеше документ според кој бил помилуван и поранешниот министер Горан Весиќ, обвинет во случајот со падот на настрешницата во Нови Сад.

Министерството за правда го демантираше тоа, а министерот Ненад Вујиќ поднесе кривична пријава против непознато лице поради сомнеж за фалсификување.

Засега не е објавен целосниот список на сите 49 лица што Вучиќ ги помилувал или ги ослободил од кривично гонење.