Нелегално превезувале туристи, па со ратрак удриле вработен во паркот

Двајца мажи заработија кривична пријава откако со ратрак превезувале туристи на Попова Шапка без дозвола, а ситуацијата ескалирала кога се обиделе да ги спречат вработени од Националниот парк.

Како што информира МВР во дневниот Билтен, 41-годишен скопјанец и 54-годишен жител на тетовското село Брвеница организирале превоз на туристи, иако немале лиценца ниту договор со надлежните.

Кога вработени од паркот се обиделе да ги запрат, наместо да се повлечат – тие упатиле закани.

- Advertisement -

Ситуацијата дополнително се влошила кога едниот од нив, управувајќи ратрак, се обидел да ги оттурне службените лица, при што со механичката корпа удрил еден од вработените.

По случајот реагирала полицијата, а против двајцата е поднесена кривична пријава за спречување службено лице во вршење должност.