НЕКОЈ ПОДМЕТНАЛ ПОЖАР И НА ШАР ПЛАНИНА

Пожар избил вчера на територијата на Националниот парк Шар Планина, на местото викано Виноград, помеѓу селата Ѓурѓевиште и Ломница.

Пожарот зафатил околу 0,5 хектари ниска вегетација и пасиште.

– За среќа, не е причинета поголема материјална штета. Но во услови на високи температури и исклучително сува вегетација, секој мал пожар за само неколку минути може да прерасне во сериозна закана за шумите, природата и населените места во близина. Особено загрижува фактот што пожарот можел да се прошири кон тешко пристапни делови на Шар Планина, каде интервенцијата од земја е исклучително тешка, а во одредени ситуации и невозможна без поддршка од воздух – велат од Националниот парк Шар Планина.

- Advertisement -

Според првичните сознанија, причината за пожарот е човечки фактор, а увид на местото извршиле полициски службеници.

Катастарски, опожарената површина е евидентирана како пасиште со кое управува Јавното претпријатие за пасишта, а се наоѓа во границите на Националниот парк Шар Планина.

– Упатуваме голема благодарност до Дирекцијата за заштита и спасување и до противпожарните единици од Гостивар, Боговиње и Тетово, кои со заедничка и навремена интервенција успеаја пожарот да го локализираат околу 22:00 часот. Но ова е сериозно предупредување за сите нас. Во период кога на повеќе места низ државата истовремено има активни пожари, ресурсите за справување со нив се ограничени. Не можеме да очекуваме дека воздухоплови и дополнителни сили ќе бидат достапни за секој пожар предизвикан од неодговорно однесување на поединци. Затоа уште еднаш апелираме: Не палете оган на отворено, не фрлајте отпушоци од цигари, не преземајте никаква активност што може да предизвика искра или пожар – нагласуваат од НП Шар Планина.

Оттаму апелираат доколку граѓаните забележат чад или оган, да пријават веднаш, додека пожарот сè уште може брзо да се локализира.

– Апелот го упатуваме до сите – посетители, планинари, земјоделци, сточари и жители на населените места на Шар Планина. Во вакви временски услови, доволна е една искра за последиците да бидат огромни. Одговорноста е заедничка. Бидете исклучително внимателни и помогнете ни да не дозволиме да гори Шар Планина – порачуваат од Националниот парк Шар Планина.