НЕ БИЛО КАРПА, КИТ ИМ ЈА ПОТОПИЛ ЈАХТАТА

Силен удар ја фрлил 16-метарската јахта „Таи Там“ настрана среде Јужниот Пацифик, а кога Австралијката Џема Купер погледнала преку левата страна, пред себе видела група од шест до осум китови. Еден од нив удрил во јахтата, која по повеќечасовна борба со водата на крајот потонала.

Купер била на кормилото кога одеднаш слушнала силен тресок и од ударот била исфрлена од својата позиција.

– Целиот брод беше фрлен настрана – раскажа таа за АФП.

- Advertisement -

Според екипажот, еден или два од китовите биле речиси долги колку нивната јахта. Ударот го оштетил системот за управување, отворил неколку пукнатини во трупот од фиберглас и водата почнала брзо да навлегува.

Околу половина час подоцна екипажот испратил повик за помош. Четворицата со часови ја испумпувале водата и се обидувале да го одржат бродот на површината.

Французинот Мартин Жафр, столар по професија, се обидел да ги затвори пукнатините со експандирачка пена. Во еден момент дури нурнал под јахтата за да ја провери штетата.

Новозеландските воздухопловни сили испратиле патролен авион П-8А „Посејдон“, кој ги лоцирал морнарите и помогнал во координацијата на спасувањето.

Во текот на ноќта екипажот сфатил дека „Таи Там“ повеќе не може да се спаси и преминал во сплав. Во раните утрински часови го пресекле јажето што сè уште ги поврзувало со јахтата, стравувајќи дека бродот ќе ги повлече со себе.

Од сплавот потоа гледале како „Таи Там“ исчезнува под површината на Пацификот.

Четворицата поминале околу 18 часа на море пред да бидат забележани од 143-метарскиот контејнерски брод „МВ Софрана Сурвил“. Сите успеале да се качат на бродот и биле спасени без сериозни повреди.

– Беше прекрасен, прекрасен и во исто време ужасен крај. Но, за среќа, никој не го загуби животот – рече Џереми Купер, сопругот на Џема Купер.