МВР со рекордна заплена на опојна дрога марихуана,случајот ќе биде заведен во аналите на криминологијата на светско ниво

Судска наредба, претрес, јавен обвинител и една семка. Виничанец ќе добие кривична пријава

Македонската полиција е повторно на висина на задачата. Овојпат нејзината неуморна борба против дрогата ја водеше акцијата во Виница, каде што по претрес на домот на 25-годишен жител е пронајдена и одземена дури цела една семка марихуана. Во акцијата е одземена и метална дробилка.

Претресот е спроведен на 16 октомври, по судска наредба, од полициски службеници од ОВР Виница. За „обемната“ операција е известен јавен обвинител, а по целосното документирање на настанот ќе следува соодветна пријава, соопштија од МВР.

- Advertisement -

Што значи „целосно документирање“ на една семка? Дали ќе се мери, дали ќе се фотографира од сите страни и дали ќе ѝ се утврди староста? Тоа за сега не е познато. Познато е само дека целата постапка ја следи судска наредба, а тоа е ред што би им годел и на посериозни случаи, доколку граѓаните го чекаат толку верно.

Дробилката, пак, веројатно ќе добие посебно место во доказниот материјал. Како и секоја друга дробилка, и таа ќе мора да докаже дека не е обична кујнска направа.

Сепак, под иронијата стои и сериозно прашање: колку е соодветно да се активира судска наредба, полициска екипа, јавен обвинител и целиот апарат на кривична пријава за еден предмет од овој вид? Можеби одговорот е да, затоа што законот е закон, па и мала количина може да има правно значење. Но јавноста со право се прашува дали полицијата и обвинителството не би имале поважна работа, на пример големите плантажи и мрежите што ги снабдуваат. Тие, за разлика од семката, не се собираат во една кесичка.

Додека не се објави пријавата, не е познато за кое кривично дело ќе се товари осомничениот. Лицето се смета за невино сè до правосилна пресуда.