Микропластика пронајдена во речиси две третини од коралите во заштитена морска област

Истражување спроведено во заштитена морска област во Малезија покажа дека речиси две третини од анализираните примероци на корали содржат микропластика. Резултатите укажуваат на тоа дека дури и областите под посебна заштита не се поштедени од загадување со пластика.

Научници од Универзитетот „Теренгану“ во Малезија анализираа 200 примероци на корали собрани од пет локации во рамките на Морскиот парк „Пулау Реданг“, во јужниот дел на Јужнокинеското Море. Микропластика беше пронајдена во 64 отсто од примероците.

Најчесто идентификуваниот вид пластика беше полиетилен терефталат (ПЕТ) – материјал што масовно се користи за производство на пластични шишиња за пијалаци за еднократна употреба.

- Advertisement -

Истражувачите анализираа два вида тврди корали: *Acropora* и *Porites*. Тие открија дека коралите заплеткани во пластичен отпад или влакна содржеле речиси три пати повеќе микропластика во своите скелети, во споредба со оние што немале директен контакт со таков отпад.

Туризмот како потенцијален извор на дополнителен притисок

Највисоките концентрации на загадување беа забележани на локации во близина на туристички зони. На „Лонг Бич“ (Long Beach), една од најпосетените локации, беа пронајдени 1,31 честичка микропластика по грам корал. На локацијата „Чагар Хутанг“ (Chagar Hutang) – област наменета за заштита на желките што се гнездат – беа забележани 0,54 честички по грам.

Сепак, истражувачите предупредуваат дека не може со сигурност да се тврди оти туризмот е директниот извор на пронајдената пластика, бидејќи морските струи можат да го пренесат загадувањето на големи растојанија. Микропластиката може да навлезе во морето преку разградување на поголеми пластични предмети, риболовна опрема, индустриски материјали и други производи.

Научниците сè уште не можат прецизно да ги утврдат долгорочните последици од ова загадување врз здравјето на коралните гребени. Сепак, наодите од истражувањето укажуваат на тоа дека заштитата на морските области мора да опфаќа и спречување на навлегувањето на пластичен отпад во морето.