Претседателот на Франција, Емануел Макрон, вели дека Европа им е сојузник на САД, но дека е подготвена да возврати за царините, објави Си-Ен-Ен.
– Веќе го направив тоа и ќе го направам повторно – изјави Макрон.
Реакцијата на Макрон е предизвикана од најавите на претседателот на САД, Доналд Трамп, дека ќе воведе реципрочни царини кон трговските партнери.
Тој додаде дека ЕУ не треба да им биде „главен приоритет“ за САД, велејќи дека нивниот прв проблем е Кина.
– Дали Европската Унија е вашиот прв проблем? Не, не мислам така. Вашиот прв проблем е Кина, затоа треба да се фокусирате на првиот проблем – додаде претседателот на Франција.
Макрон рече дека царините ќе им наштетат на европските економии, но и на САД, со оглед на нивото на економските врски.
– Тоа значи дека ако поставите царини на многу сектори, тоа ќе ги зголеми трошоците и ќе создаде инфлација во САД. Дали е тоа она што го сака вашиот народ? Не сум толку сигурен – потенцираше Макрон.
Претседателот на Франција предупреди дека ЕУ мора да биде спремна да реагира на акциите на САД, но нагласи дека блокот од 27 нации главно треба да дејствува во полза на самата Европа.
– Ова е причината зошто, за мене, врвен приоритет на Европа е агендата за конкурентност, агендата за одбрана и за безбедност, амбициите за вештачка интелигенција и ајде да одиме брзо за себе. Ако во меѓувреме имаме проблем со тарифите, ќе разговараме за нив и ќе го поправиме тоа – појасни Макрон.
За време на неговиот прв мандат, Трамп воведе царини од 25% за челик и 10% за алуминиум, но подоцна им додели бесцарински квоти на неколку трговски партнери, вклучувајќи ги Канада, Мексико, ЕУ и Велика Британија.
Трамп набргу по доаѓањето во Белата куќа, откако беше избран за претседател, најави воведување царини од 25% за увоз од Канада и Мексико и 10% за стоки од Кина.
