Мафијата има нов опасен метод за ликвидации низ Европа

Криминалните мрежи во Европа сè почесто користат нова опасна тактика, регрутирање малолетници и млади луѓе преку интернет за извршување убиства, напади и други тешки кривични дела.

Феноменот познат како „убиство како услуга“ (violence as a service) го привлече вниманието на европските безбедносни служби, откако беше откриено дека организирани криминални групи преку социјални мрежи и шифрирани апликации пронаоѓаат млади луѓе кои се подготвени за пари да извршат ликвидации.

Една од мрежите што се поврзува со ваков начин на делување е шведската криминална организација „Фокстрот“, која според истрагите е поврзана со десетици убиства, напади и обиди за напади во Европа.

- Advertisement -

Еден од најпознатите случаи е ликвидацијата во предградие на Стокхолм, каде 18-годишниот Атила Азимов бил ангажиран да убие човек за пари.

Според истрагата, тој во текот на ноќта следел цел која ја добил од криминалната мрежа, но на крајот го убил погрешниот човек, 20-годишниот студент Мурад Абделкадер, кој се враќал дома по работа во ресторан.

Азимов бил снимен од безбедносни камери, а подоцна бил уапсен и осуден на доживотна затворска казна.

Истражителите велат дека тој никогаш не ги добил ветените пари, што е дел од шемата на криминалните групи, младите извршители најчесто завршуваат во затвор пред да бидат исплатени.

Според европските истражители, младите најчесто се контактираат преку интернет платформи, каде им се нудат пари за конкретни задачи.

Инструкциите, како што наведуваат од европската оперативна група ОТФ ГРИМ, често се даваат на начин сличен на компјутерски игри, младите добиваат чекори, локации и задачи кои треба да ги исполнат.

Шефот на Европскиот центар за сериозен и организиран криминал при Европол предупредил дека станува збор за „пресметано префрлање на одговорноста за убиствата врз ранливи млади луѓе“.

Во борбата против овој феномен учествуваат 11 европски земји, меѓу кои Шведска, Норвешка, Данска, Германија, Франција, Холандија, Белгија, Шпанија и Велика Британија.

Еден од примерите е случајот со Норвежанецот Јоханес Натланд, кој бил обвинет дека патувал во Велика Британија за да изврши убиство за мрежата „Фокстрот“.

Според обвинителството, тој бил контактиран преку интернет и му била понудена сума од околу 270.000 норвешки круни, односно околу 21.000 фунти.

Тој добил инструкции преку апликацијата „Сигнал“, а организаторите му обезбедиле патување, документи и насоки каде да најде оружје.

Во близина на Хадерсфилд, според истрагата, му биле испратени мапи и снимки со локации каде биле скриени пиштоли и пари.

Натланд бил уапсен пред да стигне да ја изврши задачата.

Истражителите откриле дека еден од младите посредници, познат под прекарот „Генерален“, започнал да регрутира други тинејџери додека и самиот бил малолетен.

Тој, според обвинението, ангажирал повеќе лица за извршување убиства во Шведска.

Меѓу нив бил и Азимов, кој го извршил убиството на погрешната жртва, како и уште еден 17-годишник кој убил човек во јужниот дел на Шведска.

Ниту еден од нив не ги добил ветените пари.

Истражувачите велат дека изборот на тинејџери не е случаен.

Младите полесно се убедуваат, често не размислуваат за последиците и се подготвени да преземат ризици кои возрасните криминалци би ги избегнале.

„Фокстрот“ и сличните групи на тој начин ја намалуваат сопствената изложеност, бидејќи директните извршители најчесто се фатени, додека организаторите остануваат во сенка.

Оперативната група ОТФ ГРИМ за 15 месеци спровела повеќе од 280 апсења поврзани со овој феномен.

Еден од најважните удари бил апсењето на Али Шехад Ахмед, лице кое шведската полиција го поврзува со организирање на дел од активностите на „Фокстрот“.

Тој бил уапсен во Ирак, а Шведска побарала негово екстрадирање.

Сепак, лидерот на мрежата, Рава Маџид, и понатаму е недостапен. Според истрагите, тој се наоѓа во Иран.

Новинарски истраги тврдат дека дел од нападите имале политичка позадина

Шведскиот истражувачки новинар Дијамант Салиху, кој повеќе години ја следи мрежата „Фокстрот“, тврди дека организацијата има врски со иранскиот режим.

Според него, дел од нападите биле насочени кон противници на иранските власти, дисиденти, новинари и израелски цели, додека други биле поврзани со криминални пресметки околу трговија со дрога.

Иако безбедносните служби успеале да уапсат голем број осомничени, предупредуваат дека моделот веќе го преземаат и други криминални групи.

Регрутирањето ранливи тинејџери за извршување најтешки злосторства од Шведска се проширило кон други делови на Европа, а истрагите покажуваат дека овој тренд веќе стигнал и до Велика Британија.