Лескир: Велика Британија е секогаш добредојдена назад во Европската Унија

Велика Британија е секогаш добредојдена назад во Европската Унија – изјави францускиот министер за економија и финансии Ролан Лескир, откако британскиот премиер Енди Барнам не ја исклучи можноста Лабуристичката партија да се обврзе на повторно приклучување кон блокот во својата следна изборна програма.

Во интервју за Би-Би-Си, Лескир рече дека обновувањето на членството во ЕУ зависи од британското општество, но додаде дека Обединетото Кралство е секогаш добредојдено назад во Унијата.

Францускиот министер истакна дека британскиот народ ја донел одлуката за Брегзит „и тоа, се разбира, е целосно негово право“.

- Advertisement -

– Но, можам да им кажам само едно: вратете се кога ќе посакате – додаде тој.

Лескир го изјави ова откако Барнам навести дека Лабуристичката партија би можела повторно да го разгледа ова прашање во својата идна програма.

Барнам на конгресот на Лабуристичката партија – првиот на кој учествува откако ја презеде премиерската функција – рече дека не станува збор за „избрзано организирање референдум“. Тој нагласи дека најпрво треба да се постигне политички консензус за идните односи на Обединетото Кралство со Брисел. Барнам, сепак, додаде дека доколку јавноста покаже желба за повторно приклучување на Велика Британија кон ЕУ, тој би можел да се обврзе на разгледување на прашањето за референдум во следната изборна програма на партијата.

Изјавата на Барнам во врска со ЕУ беше поздравена и од францускиот претседател Емануел Макрон и од шпанскиот премиер Педро Санчез, кој изјави дека со „отворени раце“ би го пречекал Обединетото Кралство назад во блокот.

Барнам во својот говор на конгресот истакна дека Брегзит донел „повеќе штета отколку корист“. Тој вети дека ќе претстави конкретни можности за Велика Британија на самитот меѓу Обединетото Кралство и ЕУ, кој, според него, ќе се одржи во ноември.

– Не можам да го избегнам прашањето за Европа ако треба да претставам веродостоен 10-годишен план за Велика Британија – изјави Барнам за „Ај-Ти-Ви њуз“

-Треба да процениме каде сме ние, каде се тие и да видиме кој е реалниот и одржлив пристап во сите области што ги споменавме, а потоа да започнеме дијалог за ова прашање – додаде британскиот лидер. Тој посочи дека неговиот „инстинкт“ му кажува дека за Обединетото Кралство „е подобро да биде поблиску“ до ЕУ, „имајќи ги предвид сите закани“ со кои се соочува светот.

Британскиот премиер денеска ќе се сретне со германскиот канцелар Фридрих Мерц, а се очекува разговорите главно да се фокусираат на одбраната и безбедноста.