Косовска ЦИК: Повеќе од два милиони гласачи имаат право на глас на изборите на 7 јуни

Централната изборна комисија на Косово (ЦИК) на денешната седница го потврди избирачкиот список за предвремените избори за Собранието на Косово, што ќе се одржат на 7 јуни, според кој 2.092.174 гласачи имаат право на глас, што е за 15.884 повеќе отколку на предвремените избори за Собранието одржани на 28 декември претходната година.

Според избирачкиот список, бројот на граѓани со право на глас на избирачките места во Косово е 1.959.962 гласачи, додека бројот на граѓани регистрирани за гласање надвор од Косово е 132.212, од кои 100.970 се регистрирани за испраќање гласачко ливче во поштенско сандаче надвор од Косово, 3.518 за испраќање гласачко ливче во поштенско сандаче во Косово и 27.724 за физичко гласање во дипломатска мисија.

Изборниот процес во странство, покрај гласањето по пошта, ќе биде организиран во 30 дипломатски мисии, од кои 17 се амбасади и 13 се конзулати, со вкупно 47 гласачки места.

- Advertisement -

Физичкото гласање во овие мисии ќе се одржи на 6 јуни, додека гласањето по пошта започна вчера.