Кој сè дојде на гала-вечерата во чест на кралот Чарлс и кралицата Камила во Њујорк

Британскиот крал Чарлс Трети и кралицата Камила ја продолжија својата посета на Соединетите Американски Држави во Њујорк, каде што посетија дел од најпознатите знаменитости, меѓу кои и историската Њујоршка јавна библиотека на Петтата авенија, како и меморијалниот комплекс посветен на жртвите од нападите на 11 септември.

Кралицата Камила, во друштво на актерката Сара Џесика Паркер, ја посети библиотеката, каде што се сретна со книжевни и модни имиња, разгледа изложба на ретки изданија и ѝ подари вреден подарок на институцијата.

- Advertisement -

Меѓу гостите беше и легендарната уредничка на списанието „Вог“, Ана Винтур, која за оваа пригода дури ги симна своите препознатливи темни очила за да ја поздрави кралицата.

Камила избра темносина свилена комбинација од дизајнерката Фиона Клер, украсена со брош во боите на британското знаме, кој ѝ припаѓал на покојната Елизабета Втора.

Во својот говор, кралицата зборуваше за љубовта кон читањето, која ја негувала уште од детството, нагласувајќи дека книгите се најдобар придружник и во добри и во тешки времиња.

Кралската двојка се сретна и со градоначалникот на Њујорк, Зохран Мамдани, а денот го заокружи со гала-вечера на хуманитарната организација Кингс Траст, основана од кралот Чарлс, која одбележува 50 години поддршка на младите во градењето кариера.

Гламурозниот настан привлече бројни светски ѕвезди, меѓу кои Лајонел Ричи, Марта Стјуарт, Стела Макартни, Карли Клос, Иман и Џасмин Тукс. Меѓу присутните беа и Донатела Версаче, како и британскиот новинар и политичар Џајлс Брандрет.

Њујорк уште еднаш покажа дека знае како да спои кралски протокол и холивудски гламур на едно место.