Израел се соочува со еколошка катастрофа поради уништувањето во Газа

Израел со недели се соочува со недостиг на вода, откако невообичаено брзото ширење на алги ги парализираше неговите постројки за десалинизација. Научниците ја припишуваат кризата на израелски напад во кој беа уништени повеќето постројки за третман на отпадни води во Газа, што доведе до масовно испуштање на непречистена канализација.

И покрај минатогодишниот прекин на огнот, во Газа сè уште владее тешка криза, особено во однос на водоснабдувањето. Палестинската територија е преплавена со глодари, а крајбрежната област е поплавена со отпадни води по уништувањето на локалните постројки за третман од страна на Израел, пренесува „Гардијан“.

Веднаш преку границата се одвива масовно цветање на микроалги што се протега во должина од 100 километри. Ова ги затна филтрите на пет од шесте големи израелски постројки за десалинизација, кои беа исклучени неколку дена, а оттогаш работат со намален капацитет.

- Advertisement -

Експертите предупредуваат дека, по речиси три години војна, еколошките последици од уништувањето во Газа сега се прелеваат и во Израел. Според Џек Гилрон, експерт за десалинизација од Институтот за истражување на води „Закерберг“ при Универзитетот „Бен-Гурион“, испуштањето на непречистени отпадни води од Газа во морето ги зголемува ризиците за израелската инфраструктура за производство на вода долж јужниот брег на Средоземното Море. „Загадувањето не познава политички граници“, изјавија од „Залул“, израелска невладина организација посветена на заштита на морската и крајбрежната животна средина во земјата.

Нас ал-Барави, 34-годишна мајка на пет деца, изјави за „Гардијан“ дека тие носат вода во канистри. „Одиме пеш носејќи тешки садови и чекаме во редици со часови. Поголемиот дел од водата не е безбеден за пиење, а децата страдаат од чести стомачни инфекции, дијареја и осип на кожата. Поради оштетените канализациски мрежи и расипаните пумпи, отпадните води течат меѓу шаторите и низ населбите“, опиша таа.

Од 7 октомври 2023 година, со бомбардирањето на Газа е уништена приближно 90 отсто од инфраструктурата за вода и санитација. Извештајот на организацијата „Лекари без граници“ укажува на тоа дека имало и директни напади врз бунари, водоводни цевки, резервоари и постројки за десалинизација.

Кризата со водата останува тешка; Пред војната, 80 отсто од водоснабдувањето доаѓаше од водоносниот слој под крајбрежниот појас, но тој извор сега е загаден со морска вода и отпадни води. Иако поголемиот дел од водата за пиење претходно доаѓаше од постројки за десалинизација и од три цевководи под контрола на израелската управа за води, тие цевководи беа исклучени на почетокот на војната и се повторно пуштени во употреба само делумно, според весникот „Гардијан“.

Бидејќи дистрибутивните мрежи се оштетени или уништени, голем дел од населението за снабдување зависи од цистерни со вода. За многумина, ова претставува тежок избор: да испијат уште една чаша вода или да ја зачуваат за миење раце и спречување болести.

Непријатна миризба, комарци и стаорци
Пат Грифитс, портпарол на Црвениот крст во Газа, предупреди дека ситуацијата веројатно ќе се влоши со доаѓањето на зимата. „Палестинците живеат опкружени со отпадни води. Тие се насекаде околу нив. Таму јадат, таму земаат вода и таму се движат“, рече тој.

Шаима ал-Катари (37) изјави за „Гардијан“: „Немаме каде да ја испуштиме водата од миењето садови и перењето алишта. Мораме да ја пуштиме да истече на улицата, создавајќи барички со застоена вода. Околу нив се создаваат алги, тие вриеат од комарци, а улиците се валкани. Страдаме од непријатни миризби, комарци ноќе, муви преку ден, како и од глодари“.

Навистина, стаорците со месеци ги преплавуваат деловите на Газа, размножувајќи се среде канализацијата и купиштата ѓубре што се натрупуваат околу пренатрупаните кампови за раселени лица.

Условите во Газа
И израелските населби во близина на границата со Газа се соочуваат со наезда од стаорци, бидејќи глодарите во голем број навлегуваат во домовите и градините. „Последиците од војната не запираат на границата“, рече Нада Маџдалани, палестинската директорка на организацијата „EcoPeace Middle East“. „Веќе гледаме пораст на случаите на хепатитис А во Газа. Верувам дека сме на работ на катастрофа. А сериозна епидемија на болест во Газа не мора нужно да остане во нејзините граници“, додава таа.

Во меѓувреме, израелските власти ги повикуваат луѓето разумно да ја користат водата сè додека системот целосно не се обнови. На земјоделците во јужниот дел на земјата им е наредено да го прекинат наводнувањето.