Иран предупредува на „поширок конфликт“, тензиите повторно ескалираат

Конфликтот меѓу САД и Иран повторно се заострува, откако двајца американски војници загинаа, а еден се води како исчезнат по иранските напади во Јордан. Информацијата ја потврди Централната команда на американската војска (CENTCOM), која соопшти дека станува збор за првите американски воени жртви во конфликтот од март годинава.

Според соопштението, нападите биле извршени на 17 јули, кога американските и сојузничките сили одбивале ирански балистички ракети и беспилотни летала насочени кон нивните позиции во Јордан.

„Двајца американски војници беа убиени во борба во Јордан на 17 јули, додека Централната команда и партнерските сили ги одбија иранските напади со балистички ракети и беспилотни летала. Еден војник исто така е исчезнат“, соопшти CENTCOM.

- Advertisement -

Американската војска засега не ги објавува имињата на загинатите, бидејќи нивните семејства сè уште не се официјално известени.

Во нападите биле повредени уште четворица американски војници, кои биле префрлени во болници во Јордан. Според американската команда, по укажаната медицинска помош тие се пуштени на домашно лекување, додека други припадници на војската се здобиле со полесни повреди и се вратиле на должност.

Со најновите жртви, бројот на загинати американски војници од почетокот на ескалацијата на конфликтот се искачи на 15.

Последните загинати доаѓаат во време кога примирјето меѓу Вашингтон и Техеран практично пропадна, а двете страни повторно разменуваат воени удари.

Во изминатите денови американските сили извршија нови воздушни напади врз ирански воени цели, по што следуваше бран ирански ракетни и беспилотни напади врз американски бази и објекти на Блискиот Исток.

Според американската војска, цел на операциите биле надзорни позиции, логистичка инфраструктура, подземни складишта за оружје и поморски објекти.

Од друга страна, иранските медиуми објавија дека експлозии биле регистрирани во Сирик, Ахваз и Јазд, додека локалните власти во покраината Хормозган тврдат дека американски проектил погодил фабрика за десалинизација на вода.

Американската страна засега не ги коментираше овие наводи.

Во меѓувреме, иранските власти соопштија дека 12 лица загинале во последните 24 часа, а Министерството за здравство наведе дека од обновувањето на конфликтот во американските напади загинале најмалку 50 лица, додека повеќе од 500 се повредени.

Техеран во меѓувреме ги повика своите регионални сојузници да бидат подготвени за, како што наведува, „поширок конфликт“, што дополнително ги зголемува стравувањата од натамошна ескалација на кризата на Блискиот Исток.